Búgin, 9-noyabr kúni paytaxtımız Nókis qalasındaǵı «Aqquw» kompleksinde «Jasıl mákan» ulıwma milliy joybarı sheńberinde «Jasıl keleshek» ulıwma respublikalıq marafonı shólkemlestirildi.

Keń masshtabta ótkerilgen ekologiyalıq ilajǵa Ózbekstan Respublikasınıń barlıq aymaqlarınan 100 den aslam joqarı oqıw orınlarınıń basshıları, professor-oqıtıwshıları, ilimpaz qánigeler hám belsendi student-jaslarınan ibarat 1500 den aslam adam qatnastı.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev sózge shıǵıp, ulıwma respublikalıq marafon qatnasıwshılarına minnetdarshılıq bildirdi hám Prezidentimizdiń tikkeley baslaması menen Aral teńiziniń qurıǵan ultanında ámelge asırılıp atırǵan keń kólemli jumıslardıń nátiyjesinde 2 million gektarǵa shamalas duzlı qumda jasıl toǵaylıqlar payda etilgenligi, bunday iygilikli jumıslar ele de úlken shólkemleskenlik penen dawam etip atırǵanlıǵın atap ótti.

Bunnan soń Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov shıǵıp sóylep, mámleketimiz basshısınıń Aralboyı regionınıń hár tárepleme rawajlanıwı, bul aymaqta ekologiyalıq turaqlılıqtı támiyinlew baǵdarındaǵı jumıslardıń nátiyjeliligin arttırıwda ilimiy-ámeliy jaqtan tiykarlanǵan usınday keń kólemli ilajlardıń áhmiyeti joqarı ekenligine toqtaldı.

Soń «Jasıl keleshek» ulıwma respublikalıq marafonına start berildi. Qatnasıwshılar Nókis qalasında 8 gektarlıq maydanda jaqsı niyetler menen jergilikli klimat sharayatlarına iykemlesken terek nállerin otırǵızıp, «Ziyalılar baǵı»n shólkemlestirdi. Marafonǵa onlayn telekópir arqalı respublikalıq joqarı oqıw orınlarınıń jámáátleri de qatnasıp, tarawda «Jasıl mákan» ulıwma milliy akciyası joqarı shólkemleskenlik penen baslap jiberildi.

Mádeniyat hám kórkem óner sheberleriniń atqarıwındaǵı koncert baǵdarlaması marafon qatnasıwshılarınıń kewillerine xosh keypiyat baǵıshladı.

NMPI baspasóz xızmeti.