Nawayı mámleketlik universitetinde XIX ásir qaraqalpaq ádebiyatınıń kórnekli wákili Ájiniyaz Qosıbay ulınıń 200 jıllıq yubileyine baǵıshlanǵan ilimiy-teoriyalıq konferenciya bolıp ótti.

Konferenciyaǵa Berdaq atındaǵı Qaraqalpaq mámleketlik universiteti qaraqalpaq ádebiyatı kafedrasınıń professorı, filologiya ilimleriniń doktorı Q.Orazımbetov, filologiya ilimleriniń kandidatı, professor B.Genjemuratov hám Ájiniyaz atındaǵı Nókis mámleketlik pedagogikalıq institutı qaraqalpaq ádebiyatı kafedrasınıń úlken oqıtıwshıları, filologiya ilimleri boyınsha filosofiya doktorları Á.Seytbekov, K.Matimovlar bayanatları menen qatnastı.

Kúnniń ekinshi yarımında miymanlar wálayattaǵı Kenimex rayonındaǵı ulıwma bilim beriw mekteplerinde bolıp, ullı shayırdıń ádebiy miyrası haqqında sáwbetlesip, Qaraqalpaq folklorınıń 100 tomlıǵı, jazıwshı-shayırlardıń ádebiy shıǵarmaları hám ádebiyatshı alımlardıń ilimiy miynetlerin mektep kitapxanalarına sawǵa etti.

NMPI baspasóz xızmeti.