Búgin, 13-noyabr kúni Koreya Respublikasınıń Ózbekstandaǵı ayrıqsha hám tolıq huqıqlı Elshisi mırza Von Do Yon basshılıǵındaǵı delegaciya aǵzaları Ájiniyaz atındaǵı Nókis mámleketlik pedagogikalıq institutına keldi.

Institut rektorı wazıypasın waqıtsha atqarıwshısı Quvondiq Qodirov penen bolıp ótken ushırasıwda Ózbekstan-Koreya Respublikası arasındaǵı sawda-ekonomikalıq, mádeniy-gumanitar tarawlar menen birge bilimlendiriw tarawındaǵı birge islesiwlerdiń nátiyjeli dawam etip atırǵanlıǵı atap ótildi. Sonday-aq, institutta ilimiy-pedagogikalıq baǵdarda xalıqaralıq birge islesiw boyınsha ámelge asırılıp atırǵan jumıslar tuwralı maǵlıwmatlar berildi.

Elshi mırza Von Do Yon joqarı kóterińkilik hám jıllıjúzlilik penen kútip alǵanı ushın institut rektoratı wákillerine minnetdarshılıq bildirip, elimiz boylap keń kólemde belgilenip atırǵan Ájiniyaz Qosıbay ulınıń 200 jıllıǵı, sonday-aq, instituttıń 90 jıllıǵı menen qızǵın qutlıqladı. Mámleketlerimiz arasında sońǵı jıllarda ekonomikalıq tarawlar menen birgelikte bilimlendiriw tarawına investiciyalar kirgiziw boyınsha unamlı jumıslar ámelge asırılıp atırǵanlıǵın ayrıqsha atap ótti.

Sáwbetlesiw barısında Koreya Respublikasınıń eń aldınǵı joqarı oqıw orınları menen eki tárepleme birge islesiwdi jolǵa qoyıw, institut professor-oqıtıwshıları hám studentleriniń stajirovkalar jáne oqıw baǵdarlamaları sheńberinde grantlar joybarlarına qatnasıwına kómeklesiw, institutta jumıs alıp barıp atırǵan «Koreya múyeshi»niń jumısların ele de jetilistiriw máseleleri dodalanıp, aldaǵı waqıtlarda birgelikte ámelge asırılatuǵın jumıslar belgilep alındı.

Bunnan soń delegaciya aǵzaları Qaraqalpaqstanda koreys tilin úyretiw boyınsha tiykarǵı oray sıpatında jumıs islep atırǵan instituttaǵı «Koreya múyeshi»nde bolıp, bul jerge hár qıylı tematikadaǵı oqıw ádebiyatları hám zárúr buyımlardı tapsırdı.

Elshi mırza oraydıń jumıslarına joqarı baha berip, bul jerde xızmet etip atırǵan juwapkerlerge minnetdarshılıǵın bildirdi.

Delegaciya aǵzaları instituttıń jańa oqıw imaratında jaratılǵan sharayatlar menen tanısıp, unamlı pikirlerin bildirdi.

Instituttıń «Sıy perde» duwtarshılar ansambli atqarıwındaǵı milliy qosıqlar delegaciya aǵzalarında úlken qızıǵıwshılıq payda etti.

NMPI baspasóz xızmeti.