Búgin, 15-noyabr kúni Ájiniyaz atındaǵı Nókis mámleketlik pedagogikalıq institutında qaraqalpaq klassikalıq ádebiyatınıń kórnekli wákili Ájiniyaz Qosıbay ulınıń 200 jıllıǵı múnásibeti menen shólkemlestirilgen Ájiniyaz muzeyiniń saltanatlı ashılıw máresimi bolıp ótti.

Ilajǵa Qaraqalpaqstan Respublikası Joqarǵı Keńesi hám Ministrler Keńesi, Respublikalıq Ruwxıylıq hám aǵartıwshılıq orayı, Joqarı bilimlendiriw, ilim hám innovaciyalar ministrliginiń wákilleri, Túrk Akademiyasınıń wákili Aynur Mayemerova, Qırǵızstan Respublikası Milliy Ilimler Akademiyası Sh.Aytmatov atındaǵı Til hám ádebiyat institutınıń direktorı, akademik Abdıldajan Akmataliev, Ázerbayjan Respublikası Baku slavyan universitetiniń professorı Nizami Mammedov, Túrkiya Respublikası Hajı Bayram Veli universitetiniń professorı Huseyn Yıldırım, Ázerbayjan Respublikası Milliy Ilimler Akademiyası Fizuliy atındaǵı Qoljazbalar institutınıń bas ilimiy xızmetkeri Nezaket Mammadli, usı akademiyanıń Folklor institutı docenti Shabnam Mammadova, sonday-aq, respublikamızdıń aldınǵı joqarı oqıw orınlarınan, ilimiy oraylarınan belgili ilimpazlar, professorlar, nuranıy ustazlar, ádebiyatqa janı qumar jaslar, keń jámiyetshilik hám ǵalaba xabar quralları wákilleri qatnastı.

Qatnasıwshılar dáslep xalqımızǵa tán bolǵan miymandoslıq penen, instituttıń «Sıy perde» duwtarshılar ansambliniń atqarıwındaǵı milliy qosıqlar menen kútip alındı. Bunnan soń muzeydiń ashılıw máresimi baslanıp, dástúriy lenta kesildi.

Saltanatlı ilajda institut rektorı wazıypasın waqıtsha atqarıwshısı Quvondiq Qodirov sózge shıǵıp, usı jıldıń 16-iyul kúni qabıl etilgen Prezidentimizdiń «Belgili qaraqalpaq shayırı hám oyshılı Ájiniyaz Qosıbay ulı tuwılǵan kúniniń 200 jıllıǵın keńnen belgilew haqqında»ǵı qararına muwapıq shayırdıń yubileyi respublikalıq hám xalıqaralıq kólemde keń túrde belgilenip atırǵanlıǵın atap ótti.

Ásirese, Prezidentimizdiń baslaması menen xalqımızdıń súyikli shayırınıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgizilgenligi xalqımızdı sheksiz quwanıshqa bóledi.

Ájiniyazdıń poeziyalıq dóretpeleri tek ǵana qaraqalpaq hám ózbek tillerinde basılıp qoymastan, túrk, ázerbayjan, inglis hám basqa da tillerge awdarılıp, óz aldına toplam bolıp baspadan shıǵarıldı. «Qaraqalpaqfilm» kinostudiyası tárepinen «Ájiniyaz» kórkem-publicistikalıq filmi súwretke alınıp, premerasın ótkeriwge tayarlıqlar qızǵın dawam etpekte. Sonıń menen birge, Ózbekstan Kórkem óner akademiyasında shayırdıń ómiri hám dóretiwshiligine baǵıshlanǵan kórgizbe, Tashkent mámleketlik ózbek tili hám ádebiyatı universiteti jáne Qaraqalpaq mámleketlik universitetinde Ájiniyaz Qosıbay ulınıń ádebiy miyrasın úyreniwge arnalǵan xalıqaralıq ilimiy-ámeliy konferenciyalar joqarı dárejede shólkemlestirildi. Respublikamız boylap hár bir oqıw ornında shayırdıń dóretiwshiligine arnalǵan kórkem-ádebiy kesheler ótkerilip, jaslar arasında Ájiniyazdıń qosıqların bunnan bılay da keń en jaydırıw maqsetinde hár qıylı tańlawlar shólkemlestirilmekte. Moynaq rayonındaǵı shayırdıń qoyımshılıǵı abadanlastırılmaqta.

Sózge shıqqanlar mámleketimiz basshısınıń tiyisli qararında Ájiniyaz atındaǵı Nókis mámleketlik pedagogikalıq institutında Ájiniyaz muzeyin shólkemlestiriw boyınsha tiyisli wazıypalar belgilengenligi, bunıń ushın institut jámááti tárepinen nátiyjeli jumıslar ámelge asırılıp, búgin muzeydiń saltanatlı ashılıwı bayramǵa ulasıp atırǵanlıǵın ayrıqsha atap ótti.

Muzeyge kelgen hár qanday adam Ájiniyaz Qosıbay ulınıń ómiri hám dóretiwshiligi haqqında maǵlıwmatlarǵa iye boladı. Qaraqalpaq xalqınıń milliy kiyim-kenshekleri, saz ásbapları, tutınıw buyımları, medreselerde oqıtılǵan kitaplardıń nusqaları shayır jasaǵan dáwirdiń nápesin payda etedi. Muzeyde eń tiykarǵı kózge taslanatuǵını – bul Ájiniyaz Qosıbay ulınıń shejiresi. Bul shejire instituttıń qaraqalpaq ádebiyatı kafedrasınıń úlken oqıtıwshısı, filologiya ilimleri boyınsha filosofiya doktorı Marat Esebaev tárepinen alıp barılǵan ilimiy-izertlew jumıslarınıń nátiyjesi bolıp, usı kúnge shekem shayır áwladlarınıń bir pútin sistematikası bolıp tabıladı.

Sonday-aq, muzeydiń bir múyeshi institut turmısına arnalǵan bolıp, bul jerde bıyıl 90 jıllıq torqalı toyın belgilep atırǵan Qaraqalpaqstan Respublikasındaǵı tuńǵısh joqarı oqıw ornı – Ájiniyaz atındaǵı Nókis mámleketlik pedagogikalıq institutınıń tariyxı, búgingi kúni haqqında sóz etetuǵın eksponatlar, xronologiyalıq fotogalereyalar, instituttı basqarǵan rektorlardıń portretleri menen tanısıw múmkin.

Ilajda qatnasıwshılar muzeydegi eksponatlar menen tanısıp, onı shólkemlestiriwge xızmet eken pidayı insanlarǵa minnetdarshılıq bildirdi. Miymanlar muzeydiń estelikler kitabına ózleriniń eń jaqsı tileklerin jazıp qaldırdı.

Muzeydiń ashılıw máresimi «Ózbekstan – ulıwma úyimiz» atamasındaǵı milletler aralıq tatıwlıq hám keńpeyillik bayramına jalǵastı.

Qatnasıwshılar bayram sheńberinde shólkemlestirilgen instituttıń professor-oqıtıwshıları hám student-jaslarınıń ilimiy jáne qol miynetleri, súwretlew óneri, mádeniyat, sport jáne basqa da tarawlarda qolǵa kirgizgen tabısları sáwlelengen kórgizbe menen tanıstı.

Ilajda Túrk Akademiyasınıń wákili Aynur Mayemerova Ájiniyaz Qosıbay ulınıń túrk hám ázerbayjan tillerinde baspadan shıǵarılǵan kitapların institut kitapxanasına sawǵa etti.

Bayram ilajı instituttıń talantlı studentleri hám «Tumaris» xalıq ansambli aǵzaları atqarıwındaǵı koncert baǵdarlaması menen dawam etti.

Ájiniyaz atındaǵı Nókis mámleketlik pedagogikalıq institutı baspasóz xızmeti.