Búgin, 22-noyabr kúni Ájiniyaz atındaǵı Nókis mámleketlik pedagogikalıq institutında student-jaslardı sociallıq jaqtan qollap-quwatlaw máselelerine arnalǵan ashıq sáwbetlesiw bolıp ótti.

Ilajdı institut rektorı wazıypasın waqıtsha atqarıwshısı Quvondiq Qodirov basqarıp bardı.

Ashıq sáwbetlesiwge institut rektorınıń másláhátshisi Ǵ.Ibadullaev, rektordıń hayal-qızlar máseleleri boyınsha másláhátshisi S.Bekchanova, jaslar awqamı baslanǵısh shólkeminiń jetekshisi B.Gúlimbetov, fakultet dekanlarınıń jaslar menen islesiw boyınsha orınbasarları, tyutorlar, pedagog-tárbiyashılar, institut psixologi, sonıń menen birge, ǵalaba xabar qurallarınıń wákilleri qatnastı.

Ilajda sózge shıqqanlar házirgi waqıtta institutta kúndizgi, sırtqı, keshki hám aralıqtan oqıtıw tálim baǵdarlarında, sonday-aq, magistratura qánigeliklerinde ulıwma 17 mıńnan aslam studentler bilim alıp atırǵanı, olardıń oqıw procesi, oqıwdan tıs waqıtların mazmunlı ótkeriw, qábiletlerin arttırıp barıw maqsetinde hár qıylı dógereklerdi shólkemlestiriwdiń áhmiyeti haqqında atap ótti.

Sońǵı jıllarda elimizde jaslardı hár tárepleme qollap-quwatlaw baǵdarında ámelge asırılıp atırǵan reformalardıń ámeliy nátiyjeleri haqqında maǵlıwmatlar berildi. Atap aytqanda, Prezidentimizdiń 2022-jıl 31-avgusttaǵı PF-213-sanlı pármanı tiykarında qaraqalpaqstanlı jaslar ushın mámleketlik joqarı oqıw orınlarına 2022-2023-oqıw jılında tólemli kontrakt tiykarında 500, 2023-2024-oqıw jılında mámleketlik grant tiykarında 3 000, tólemli kontrakt tiykarında 6 500, 2024-2025-oqıw jılında tólemli kontrakt tiykarında 10 000 qosımsha kvota ajıratılǵanlıǵı, magistratura qánigeliklerine tólemli kontrakt tiykarında qabıllanǵan hayal-qızlardıń kontrakt tólemleri tolıq mámleketlik byudjet qarjıları esabınan qaplanıp atırǵanlıǵı, sonıń menen birge, sociallıq járdemge mútáj, «Temir dápter», «Hayallar dápteri», «Jaslar dápteri»ne kirgizilgen shańaraqlardıń perzentleriniń oqıwı, bilim alıwı, kásip-óner úyreniwi ushın qosımsha sharayatlar jaratılǵanlıǵı búgingi kúnniń jasları ushın úlken imkaniyatlar esigin ashpaqta.

Institutta da bul baǵdarda tiyisli jumıslar alıp barılıp atırǵanı mısallar menen atap ótildi. Oqıw ornında bilimli, ziyrek, qábiletli jaslardı qollap-quwatlaw, olardıń baslamaların júzege shıǵarıw maqsetinde jumıs alıp barıp atırǵan studentler keńesi jaslardıń haqıyqıy mánidegi súyenishi hám qollap-quwatlawshısına aylanbaqta.

Usınday imkaniyatlardan nátiyjeli paydalanıp atırǵan jaslar arasınan kóplegen mámleketlik stipendiyalar hám basqa da respublikalıq, xalıqaralıq tańlawlardıń, pán olimpiadaları, sport jarıslarınıń jeńimpazları jetisip shıǵıp atırǵanı haqqında maǵlıwmatlar berildi.

Ashıq sáwbetlesiw jaslar tálim-tárbiyasınıń áhmiyetli máseleleri dógeregindegi soraw-juwaplar menen dawam etti.

NMPI baspasóz xızmeti.