Ájiniyaz atındaǵı Nókis mámleketlik pedagogikalıq institutında Ózbekstan Respublikası Konstituciyası qabıl etilgeniniń 32 jıllıǵı múnásibeti menen «Siz nızamdı bilesiz be?» atamasındaǵı tańlaw bolıp ótti.

Tańlawǵa instituttıń Tariyx fakulteti tariyx, milliy ideya, ruwxıylıq tiykarları hám huqıq tálimi, sonday-aq, geografiya tálim baǵdarlarınıń 1-kurs studentlerinen dúzilgen ulıwma 9 komanda qatnastı.

Ilajǵa instituttıń jaslar máseleleri, ruwxıylıq hám aǵartıwgıoıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov qatnasıp, jıynalǵanlardı Ózbekstan Respublikası Konstituciyası kúni bayramı menen qutlıqladı hám qatnasıwshılarǵa áwmet tiledi.

Mámleketimizde ámelge asırılıp atırǵan keń kólemli reformalarda student-jaslardıń belsene qatnasıwın támiyinlew, joqarı mánawiyatlı, huqıqıy jaqtan sawatlı, erkin pikirleytuǵın jaslardı tárbiyalaw, adamzatqa jat bolǵan illetlerge qarsı gúresiw immunitetin qáliplestiriw, bos waqıtların mazmunlı ótkeriw, sonday-aq, jaslardıń jańalanǵan Konstituciya boyınsha bilimlerin bahalaw jáne xoshametlew maqsetinde shólkemlestirilgen tańlawda «Jas demokratlar», «Ádalat», «Turan», «Everest», «Yusticiya», «Femida», «Demokratlar», «Demokratlar», «Yusticiya» hám «Yuksalish» komandaları sálemnama, soraw-juwap hám saxnalıq kórinis sıyaqlı shártler boyınsha ózleriniń konstituciyalıq bilimlerin, kónlikpelerin sınaqtan ótkerdi.

Komandalardıń hár bir shárt boyınsha saxnalıq shıǵıwların, sorawlarǵa bergen juwapların tóreshiler quramı aǵzaları bahalap bardı.

Tańlaw juwmaǵında jeńimpazlar hám sıylı orın iyeleri anıqlandı. Barlıq qatnasıwshı komandalarǵa institut rektoratı, kásiplik awqamı komiteti tárepinen diplom hám sawǵalar tapsırıldı.

Institutta Konstituciya kúnine arnalǵan ilajlar dawam etpekte.

NMPI baspasóz xızmeti.