Assalawma áleykum, áziz watanlaslar!

Sizlerdi 8-dekabr – Ózbekstan Respublikası Konstituciyası kúni bayramı menen qutlıqlaymız.

Bıyılǵı Konstituciya bayramı mámleketimiz boylap úlken kóterińkilikte belgilenip atır. Jańa Ózbekstannıń huqıqıy tiykarı bolıp xızmet etetuǵın Bas Nızamımız 2023-jıldıń 30-aprel kúni ulıwma xalıqlıq referendum nátiyjesinde jańa redakciyada qabıl etilgen edi.

Tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq jáne erkinliklerin belgilewde áhmiyetli hújjet bolıp esaplanadı.

Mámleketlik hám jámiyetlik strukturanıń tiykarǵı principleri hám qádiriyatların belgilep beretuǵın jańalanǵan Konstituciyanıń qabıl etiliwi Ózbekstannıń siyasiy hám huqıqıy turmısında áhmiyetli waqıya esaplanıp, mámlekettiń rawajlanıwına jańasha túrtki boldı.

Bul tariyxıy hújjet hákimiyat institutların jetilistiriw, puqaralardıń huqıqların qorǵaw hám basqarıwdıń demokratiyalıq principlerin rawajlandırıwǵa qaratılǵan háreketlerdi ózinde sáwlelendiredi, mámleketimiz aldına áhmiyetli wazıypalardı belgilep beredi.
Konstituciyada tiykarǵı itibar insan hám onıń huqıqları jáne erkinlikleri, yaǵnıy Ózbekstan Respublikasınıń hár bir puqarasına jeke huqıq hám erkinlikler, siyasiy hám sociallıq-ekonomikalıq huqıqlardıń kepilliklerin támiyinlewge qaratılǵan.

Jańa Ózbekstan hám Jańa Qaraqalpaqstandı qurıwday ullı maqsetlerimizge erisiwde mámleketimizdiń jańalanǵan Konstituciyasınıń áhmiyeti úlken boladı.

Húrmetli doslar!

Kóp milletli Ózbekstan hám Qaraqalpaqstanımızdıń rawajlanıw baǵdarların belgilep beretuǵın, xalqımızdıń abadan turmısınıń kepili esaplanǵan Bas Nızamımızdıń 32 jıllıǵı qutlı bolsın!

Quvondiq Qodirov,
Ájiniyaz atındaǵı Nókis mámleketlik pedagogikalıq institutınıń rektorı.