Ájiniyaz atındaǵı Nókis mámleketlik pedagogikalıq institutı sport sarayında «English Sport Club» sheńberinde Úrgenish mámleketlik universitetiniń student-qızları menen mini futbol boyınsha jarıs shólkemlestirildi.

Jarısta Nókis mámleketlik pedagogikalıq institutı Shet tilleri fakulteti inglis tili hám ádebiyatı tálim baǵdarınıń 3-kurs studentlerinen dúzilgen «Nukus Ladybags» komandası hám Úrgenish mámleketlik universiteti student-qızlarınan quralǵan «Tumaris» komandaları ózleriniń fizikalıq imkaniyatların sınaqtan ótkerdi.

Jarıs AQSH Elshixanasınıń «English language Fellow» joybarı sheńberinde Nókis mámleketlik pedagogikalıq institutında jumıs alıp barıp atırǵan professor Djuzeppe Kyaramonte hám «Fulbrayt ETA» inglis tilin oqıtıw baǵdarlaması assistent-oqıtıwshısı Wiley Roberts trenerliginde, sonday-aq, NMPI inglis tili hám ádebiyatı kafedrasınıń docenti Dina Mamırbaeva jáne ÚrMU inglis tili hám ádebiyatı kafedrasınıń docenti Feruza Masharipovalardıń mentorlıǵında ótkerildi.

Jarısta NMPI student-qızları 3:2 esabında jeńiske eristi.

Jarıs oǵada qızǵın hám kóterińki ruwxta bolıp ótip, studentlerdiń tek ǵana sport hám inglis tili boyınsha kónlikpelerin arttırıp qoymastan, eki joqarı oqıw ornı studentleri arasında doslıq qatnasıqların bekkemlewge xızmet etti.