Búgin, 14-dekabr kúni Ájiniyaz atındaǵı Nókis mámleketlik pedagogikalıq institutında Xalıqaralıq ádebiyat, kórkem óner, mádeniyat hám sociallıq pánler akademiyası hám Ózbekstan Ilimler Akademiyası Qaraqalpaqstan bólimi menen birgelikte XIX ásir qaraqalpaq ádebiyatınıń kórnekli wákili Ájiniyaz Qosıbay ulınıń bay ádebiy miyrası, qaraqalpaq jazıwshı-shayırları hám ilimpazlarınıń dúnya civilizaciyasına qosqan ruwxıy ǵáziynesin úyreniwge arnalǵan ilimiy-ádebiy konferenciya bolıp ótti.

Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Qarjawbay Reymov basqarıp bardı.

Ilajǵa Xalıqaralıq ádebiyat, kórkem óner, mádeniyat hám sociallıq pánler akademiyası, Ózbekstan Ilimler Akademiyası Qaraqalpaqstan bóliminiń aǵzaları, belgili jazıwshı hám shayırlar, ilimpazlar, kórkem óner ǵayratkerleri, institut professor-oqıtıwshıları, doktorantlar, magistrantlar hám mámleketlik stipendiyalar tańlawlarınıń jeńimpazları bolǵan studentler qatnastı.

Konferenciyada bayanat jasaǵanlar hám sózge shıqqanlar qaraqalpaq ádebiyatınıń tariyxı, búgini hám keleshektegi rawajlanıw baǵdarları, qońsılas tuwısqan hám túrkiy xalıqlar, sonday-aq, dúnya ádebiyatı menen baylanısları, Ájiniyaz Qosıbay ulınıń tuwılǵanına 200 jıl tolıwı múnásibeti menen respublikalıq hám xalıqaralıq dárejede ótkerilip atırǵan ilajlar, shayırdıń ádebiy miyrasların bunnan bılay da tereń úyrenip, keleshek áwladlarǵa jetkeriw, xalıqaralıq birge islesiw baylanısların bekkemlew sıyaqlı máseleler boyınsha maǵlıwmatlar berip, pikir-usınısların bildirdi.

Ilaj sońında respublikamızdıń birqatar belsendi mádeniyat hám ádebiyat wákillerine Xalıqaralıq ádebiyat akademiyasınıń diplom jáne gúwalıqları tapsırıldı.

NMPI baspasóz xızmeti.