Ájiniyaz atındaǵı Nókis mámleketlik pedagogikalıq institutı Súwretlew óneri hám texnologiyalıq tálim fakultetiniń dekanı, Qaraqalpaqstanǵa miyneti sińgen mádeniyat xızmetkeri Janjayxan Dármenov «Milliy miyrasqa meniń qosqan úlesim» akciyası sheńberinde I.V.Savickiy atındaǵı Qaraqalpaq mámleketlik kórkem óner muzeyine óziniń islegen «Milliy natyurmort» kartinasın sawǵa sıpatında tapsırdı.

Ilajda muzey direktorı Tigran Mkrtıchev, belgili xudojnik Jeńis Lepesov hám instituttıń Súwretlew óneri hám texnologiyalıq tálim fakultetiniń professor-oqıtıwshıları sózge shıǵıp, Janjanxan Dármenovtıń súwretlew óneri tarawında islegen miynetleri, dóretiwshilik jumısları haqqında maǵlıwmatlar berdi. Sonday-aq, muzeyge tapsırılıp atırǵan kartinanıń dóreliw tariyxı tuwralı aytıp ótti.

Bul kartina xudojnik tárepinen 1997-jılı instituttı pitkergennen keyin islengen bolıp, onda qaraqalpaq xalqınıń milliyligi hám ózine tánligi, ámeliy qol óneri úlgileri menen palız ónimleri, miyweler hám tutınıw buyımları birgelikte ájayıp kompoziciyanı payda etkenligin kóriw múmkin.

Ilajda muzey direktorı Tigran Mkrtıchev elimizde dóretiwshilik etip atırǵan barlıq xudojniklerdi muzey menen birge islesiwge shaqırdı hám usınday bahalı kartinanı muzeyge sawǵa etip atırǵanı ushın Janjayxan Dármenovqa minnetdarshılıq bildirdi.

Ilaj qatnasıwshıları «Milliy natyurmort» kartinasın tamashalap, joqarı bahaların berdi.

NMPI baspasóz xızmeti.