Úlken arzıw-niyetler hám maqsetler menen baslaǵan 2024-jıldıń sońı jaqınlar eken, jıl dawamında erisken nátiyjeler, qolǵa kirgizgen tabıslar, arttırılǵan tájiriybe hám kónlikpelerge bir názer taslap, aldımızǵa bunnan da joqarı sheklerge jetiwdi tileymiz.

2024-jıl mámleketimizdegi tuńǵısh joqarı oqıw ornı sıpatında respublikamızdıń bilimlendiriw hám xalıq xojalıǵınıń túrli tarawlarına joqarı potenciallı maman qánigelerdi tárbiyalap shıǵarıp atırǵan Ájiniyaz atındaǵı Nókis mámleketlik pedagogikalıq institutı ushın tariyxıy áhmiyetke iye jıl boldı.

Institutta juwmaqlanıw aldında turǵan 2024-jılda ayrıqsha belsendilik kórsetip, joqarı nátiyjelerge erisken jaslardı xoshametlew, olardıń miynetlerin múnásip bahalaw hám basqalarǵa úlgi etip kórsetiw maqsetinde sıylıqlaw máresimi bolıp ótti.

Ilajda institut rektorı Quvondiq Qodirov sózge shıǵıp, esik qaǵıp turǵan jańa 2025-jıl menen jıynalǵanlardı qutlıqlap, óziniń jaqsı tileklerin bildirdi. Juwmaqlanıp atırǵan 2024-jılda institutta júz bergen áhmiyetli waqıyalar, qolǵa kirgizilgen tabıslar haqqında ayta kelip, kelesi jılda ámelge asırılatuǵın jumıslarǵa toqtalıp ótti.

Mámleketimiz basshısınıń tikkeley itibarı hám ǵamqorlıǵı nátiyjesinde mámleketlik byudjet esabınan 76 milliard sum qarjı ajıratılıp Ǵárezsizligimizdiń 33 jıllıq bayramı qarsańında eki mıń orınlıq jańa oqıw imaratınıń paydalanıwǵa tapsırılıwı tek ǵana institut jámááti ushın emes, sonıń menen birge, pútkil Qaraqalpaqstan Respublikası xalqı ushın bayramǵa múnásip sawǵa boldı.

Elimizdegi tuńǵısh ilim-bilim dárgayı bolǵan institutımızdıń 90 jıllıq torqalı toyı, sonıń menen birge, usı oqıw ornına atı berilgen ullı klassik shayırımız Ájiniyaz Qosıbay ulınıń 200 jıllıq yubileylerin respublikalıq hám xalıqaralıq dárejede belgiledik.

Búgingi kúnde pedagogikalıq institutta 600 ge shamalas tájiriybeli professor-oqıtıwshılar 17 mıńnan aslam studentlerge tálim-tárbiya berip kelmekte. Olardan 231 oqıtıwshı ilimiy dárejege iye. Sońǵı 3 jılda 82 professor-oqıtıwshı ilimiy jumısların tabıslı qorǵap shıǵıp, ilimiy dárejege iye boldı. Professor-oqıtıwshılar tárepinen ministrlik gúwalıǵına iye 55 sabaqlıq, 97 oqıw qollanba, 43 monografiya tayarlandı hám basıp shıǵarıldı.

Búgingi kúnde dúnyanıń «TOP-1000»lıq dizimine kiretuǵın 62 joqarı oqıw ornı menen shártnama hám memorandumlar dúzilgen bolıp, sonnan 15 joqarı oqıw ornı QS (Quacquarelli Symonds World University Ranks), THE (Times Higher Education) hám ARWU (The Academic Ranking of World Universities) xalıqaralıq reytinglerinen orın alǵan.

Usı shártnamalar tiykarında ótken jıl dawamında instituttıń 50 den aslam professor-oqıtıwshıları sırt ellerdegi joqarı oqıw orınları hám ilimiy-izertlew oraylarına qánigeligin jetilistiriw, seminar ótiw, ilimiy koncerenciyalarda qatnasıw, lekciya oqıw maqsetinde ilimiy stajirovkalarǵa jiberilgen bolsa, dúnyanıń «TOP-1000»lıq dizimine kiretuǵın joqarı oqıw orınlarınan 14 professor-oqıtıwshı hám qánigeler instituttıń ilimiy-pedagogikalıq jumıslarına shaqırıldı.

Sonıń menen birge, institut studentleri xalıqaralıq hám respublikalıq pán olimpiadaları, tańlawlar, sport hám intellektual jarıslar, festival, konferenciya, forum hám simpoziumlarda joqarı orınlardı iyeledi. «Tumaris» xalıq ansambli aǵzaları hám qábiletli studentler xalıqaralıq tańlawlarda joqarı nátiyjelerge erisip, respublikamızda ótkerilgen hár qıylı bayram saltanatları, xalıq seyilleri hám tamashalarında ózleriniń sheberliklerin, talantın kórsetti.

Instituttıń student-jasları sport túrleri boyınsha Ózbekstan, Qaraqalpaqstan, Aziya hám Jáhán birinshiliklerinde úlken tabıslarǵa eristi.

Álbette, bunday nátiyjelerge erisiwde institutta jaratılıp atırǵan sharayatlar, itibar jáne qollap-quwatlawdıń áhmiyeti úlken.

Ilajda usınday joqarı nátiyjelerge erisken student-jaslar túrli nominaciyalar boyınsha sıylıqlandı.

Sıylıqlaw máresimi «Tumaris» xalıq ansambli hám talantlı studentler atqarıwındaǵı bayram koncerti menen dawam etti.

Institutta jańa jıl bayramı ilajları dawam etpekte.

NMPI baspasóz xızmeti.