Ájiniyaz atındaǵı Nókis mámleketlik pedagogikalıq institutında Ózbekstan Ilimler Akademiyası Qaraqalpaqstan bólimi Qaraqalpaq gumanitar ilimler ilim-izertlew institutı menen birgelikte Qaraqalpaqstan Respublikasına miyneti sińgen ilim ǵayratkeri, Ózbekstan hám Qaraqalpaqstan xalıq bilimlendiriw aǵlası, filologiya ilimleriniń doktorı Maqset Ayımbetovtıń 70 jıllıǵına arnalǵan yubiley keshesi bolıp ótti.

Ilajdı instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov basqarıp bardı.

Keshede pedagogika ilimleriniń kandidatı, professor Arzı Pazılov, filologiya ilimleriniń kandidatı, professor Qutlımurat Qoshanov, fizika-matematika ilimleriniń doktorı, professor Barlıqbay Prenov, filologiya ilimleriniń doktorı, professor Ziyada Bekbergenova hám basqa ilimpazlar yubiley iyesiniń ómiri, ilim jolındaǵı pidayı miynetleri haqqında bayanatlar jasadı.

Maqset Ayımbetov 1977-jılı Tashkent mámleketlik universitetiniń Matematika fakultetin tabıslı pitkerip, Nókiste jańadan ashılǵan universitette dáslepki miynet jolın baslaǵan.

1987-jılı Ózbekstan Ilimler Akademiyası Áliysher Nawayı atındaǵı Til hám ádebiyat institutı janındaǵı qánigelestirilgen ilimiy keńeste «Qaraqalpaq publicistikalıq tekstleriniń leksikası hám morfologiyasınıń lingvo-statistikalıq analizi» temasında kandidatlıq dissertaciyasın tabıslı qorǵadı. Bul dissertaciyada ilimpaz qaraqalpaq publicistikalıq tekstleriniń lingvistikalıq-informaciyalıq bazası menen sóz formalarınıń jasalıw mexanizmleriniń modellerin jaratıwǵa erisedi.

1988-jılı Moskvada bolıp ótken Túrkologiya komitetiniń plenumında «Túrkiy tillerdiń mashina fondı hám túrkologiyalıq izertlewde kompyuterlestiriw» sekciyasınıń byuro aǵzası bolıp saylandı.

1994-1995-jıllarda Sankt-Peterburg qalasındaǵı Gercen atındaǵı Shet tilleri pedagogikalıq universitetinde doktorantura kursında bilim aldı.

Maqset Ayımbetov ilimiy-texnikalıq terminologiyalıq sózliklerdi dúziwge de belsene qatnastı. Bul sózlikler baspasóz xızmetkerleri hám lingvist-leksikograflar ushın paydalanatuǵın áhmiyetli ádebiyatlar qatarınan orın aldı.

Maqset Ayımbetovtı qaraqalpaq tili tekstleriniń lingvistikalıq-informaciyalıq bazasın jaratqan birinshi alım sıpatında esaplawǵa boladı. Onıń túrli janrlar boyınsha dúzgen alfaviti, keri alfavitli hám menshikli jiyilikli sózlikleriniń kólemi yarım million sóz qollanıwlarınan artıp ketti.

Onıń házirgi kúnge shekem 110 nan aslam ilimiy hám metodikalıq miynetleri baspasózde járiyalandı.

Ilimpaz baslawısh tálim metodikası kafedrasın basqarıw dáwirinde oqıw procesin globallıq mashqalalar menen baylanıslı túrde alıp barıwǵa erise aldı. Atap aytqanda, «Lingvistikalıq informatikanıń semiotikalıq tiykarları», «Semiotika», «Ata-analar menen islesiw», «Oqıwshılar jámááti menen doslıq qatnasta bolıw», «Oqıwshılar jámáátiniń jas ózgeshelikler psixologiyası» sıyaqlı tańlaw pánleriniń esabınan arnawlı kurslardı shólkemlestiriw arqalı kafedra jámááti óziniń ilimiy hám ilimiy-metodikalıq baǵdarın jarata aldı.

Ol óziniń dóretiwshilik jolın kórkem óner taraw menen de baylanıstıra aldı. Atap aytqanda, alımnıń scenariy avtorlıǵında islengen birneshe hújjetli filmler respublikamızdıń ruwxıy-aǵartıwshılıq fondınan múnásip orın aldı.

Maqset Ayımbetov házirgi waqıtta qánigelestirilgen ilimiy keńestiń jumısshı toparına qatnasıp, ilimiy dárejeli kadrlardı tayarlawǵa óz úlesin qospaqta.

Yubiley keshesinde ilimpazdıń kásiplesleri, shákirtleri, shańaraq aǵzaları hám jaqınları sózge shıǵıp, Maqset Ayımbetovtı 70 jıllıq torqalı toyı menen qutlıqladı.

NMPI baspasóz xızmeti.