Ájiniyaz atındaǵı Nókis mámleketlik pedagogikalıq institutı keńesiniń keńeytilgen májilisi juwmaqlanıw qarsańında turǵan 2024-jıl dawamında ámelge asırılǵan jumıslar hám jańa 2025-jıldaǵı baslı wazıypalarǵa baǵıshlandı.

Ilajǵa barlıq prorektorlar, fakultetlerdiń dekanları hám olardıń orınbasarları, kafedralar hám bólimlerdiń baslıqları, professor-oqıtıwshılar, tyutorlar, tiyisli juwapker qánigeler qatnastı.

Májiliste institut rektorı Quvondiq Qodirov jıynalǵanlardı kirip kiyatırǵan jańa 2025-jıl menen qutlıqlap, bıyılǵı jıl dawamında ilimiy-pedagogikalıq, oqıw-tárbiyalıq, ruwxıy-aǵartıwshılıq hám basqa baǵdarlarda qolǵa kirgizilgen tabıslar, arttırılǵan tájiriybeler haqqında toqtalıp ótti, sonday-aq, esik qaǵıp turǵan jańa jılda bul baǵdardaǵı jumıslardı sapalıq jaqtan jetilistiriw boyınsha ámelge asırılatuǵın wazıypalar haqqında institut jámáátine múrájat jolladı.

Rektor ilimiy-izertlew jumısları instituttıń rawajlanıwında, onıń xalıqaralıq kólemdegi básekige shıdamlılıǵın arttırıwda hám zamanagóy talaplar tiykarında innovaciyalıq sheshimler jaratıwda áhmiyetli rol atqaratuǵınlıǵın atap ótip, bul boyınsha orın alıp atırǵan mashqalalar jáne kemshiliklerge toqtaldı.

Kórsetilgen mashqalalardı sheshiw maqsetinde aldaǵı waqıtta ilimiy-izertlewlerge bolǵan itibardı arttırıw, xalıqaralıq birge islesiwdi keńeytiw, ilimiy bazanı rawajlandırıw, ilimiy ortalıqtı qáliplestiriw, jaslardı ilimiy-izertlew jumıslarına keńnen tartıw, institut, ilimiy-izertlew institutları hám óndirislik orınlardıń tıǵız integraciyasın kúsheytiw, xalıqaralıq, respublikalıq abıroylı ilimiy jurnallarda járiyalanatuǵın maqalalar sanı hám sapasın arttırıw boyınsha anıq belgilengen wazıypalardı atap ótti.

Sonıń menen birge, ilim hám texnologiyanıń jedel pátlerde rawajlanıp atırǵan dáwirinde oqıw procesin jetilistiriw baǵdarında ushırasıp atırǵan kemshiliklerdi kórsetip ótip, olardıń ámeliy sheshimleri boyınsha usınısların bildirdi.

Institut rektorı óz múrájatında institutta atqarıw tártibin támiyinlewde «qatań tártip-qaǵıyda hám jeke úlgi» principi tiykarında ámelge asırıw, jámáátte salamat sociallıq-ruwxıy ortalıqtı bunnan bılay da jaqsılaw, milletler aralıq tatıwlıqtı ele de bekkemlew, institutta KPI sistemasın engiziw hám basqıshpa-basqısh sanlastırıw, jınayatshılıq hám huqıqbuzarlıq jaǵdaylarınıń aldın alıw, studentlerdi bes áhmiyetli baslama sheńberindegi ilajlarǵa keńnen tartıw, professor-oqıtıwshılar hám student-jaslardı materiallıq hám ruwxıy jaqtan qollap-quwatlaw sapasın arttırıw boyınsha kelesi 2025-jılda ámelge asırılatuǵın jumıslardı belgilep berip, juwapkerlerge tiyisli tapsırmalardı berdi.

Ilajda professor-oqıtıwshılar sózge shıǵıp, rektor múrájatında atap ótilgen wazıypalardı sapalı orınlaw boyınsha óz pikir-usınısların bildirdi.

NMPI baspasóz xızmeti.