Búgin, 28-dekabr kúni Ájiniyaz atındaǵı Nókis mámleketlik pedagogikalıq institutında «Toǵız qumalaq» oyınınıń shınıǵıwları menen etyudleri» atamasındaǵı kitaptıń prezentaciyası bolıp ótti.

Ilajǵa Qazaqstan Respublikası «Toǵız qumalaq» oyını federaciyasınıń vice-prezidenti Maqsat Shotaev, usı oyın boyınsha trener Nurjan Qonarbaev, instituttıń sport oyınları kafedrasınıń baslıǵı Asqar Niyazov, qaraqalpaq tilinde basıp shıǵarılǵan kitaptıń avtorı, Qaraqalpaqstan awıl xojalıǵı hám agrotexnologiyalar institutı oqıtıwshısı Tazagúl Paxratdinova, instituttıń málimleme-resurs orayı qánigeleri hám jaslar qatnastı.

Kitaptı jámiyetshilikke tanıstırıw ilajında instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov shıǵıp sóylep, barlıq qatnasıwshılardı kirip kiyatırǵan jańa jıl menen qutlıqladı. Sońınan ata-babalarımızdan miyras bolıp kiyatırǵan toǵız qumalaq oyını, onıń búgingi jaslar tárbiyasındaǵı roli haqqında aytıp ótti.

Toǵız qumalaq – shıǵıs kóshpeli xalıqları arasında keńnen tarqalǵan, aqıl-oydı rawajlandırıwǵa baǵdarlaytuǵın oyınlardıń biri. Bul oyın arnawlı taqtayshada eki adam arasında oynaladı. Oyın taqtası – 2 qazan, 18 otaw, 162 qumalaqtan quraladı. Oyın basında hár oyınshıǵa bir qazan, toǵız otawǵa toǵız-toǵızdan salınǵan seksen bir qumalaq beriledi. Bul oyın arqalı jaslardıń, ósip kiyatırǵan áwladlardıń matematikalıq esaplaw qábiletleri jetilisip baradı.

Sońǵı jıllarda ata-babalarımızdan miyras bolıp qalǵan milliy úrp-ádetler, dástúrler menen birgelikte háreketli oyınlardı izertlew, olardı keleshek áwladlarǵa jetkeriw sıyaqlı iygilikli jumıslarda jaqsı nátiyjelerge erisip atırmız.

Usınday maqsetler jolında tayarlanǵan hám baspadan shıǵarılǵan usı kitap toǵız qumalaq oyını haqqındaǵı tiykarǵı oqıwlıq qollanbalardıń biri boldı.

Ilajda oyınnıń kelip shıǵıw tariyxı, pedagogikalıq áhmiyeti, jaslar tárbiyasındaǵı ornı haqqında maǵlıwmatlar berildi.

NMPI baspasóz xızmeti.