Ájiniyaz atındaǵı Nókis mámleketlik pedagogikalıq institutında qısqı demalıs waqtında studentler arasında ulıwma 22 tálim baǵdarı boyınsha tiyisli pánlerden onlayn pán olimpiadaları ótkerildi hám olarǵa mıńnan aslam jaslar belsene qatnastı.

Joqarı bilimlendiriw, ilim hám innovaciyalar ministrliginiń hám onıń tiykarında islep shıǵılǵan instituttıń buyrıǵı tiykarında shólkemlestirilgen onlayn pán olimpiadaları studentlerdiń bilimlerin bahalaw menen birge, jaslardı jańa maǵlıwmatlar hám bilimler menen tanıstırıw, olardıń intellektuallıq jaqtan rawajlanıwına úlesin qostı.

Usı pán olimpiadalarında jeńimpaz bolǵan hám sıylı orınlardı iyelegen studentler hár bir fakultet kesiminde institut rektoratı tárepinen múnásip xoshametlendi.

Atap aytqanda, 1-orın jeńimpazları bazalıq stipendiya muǵdarınıń eki esesi, 2-orın iyeleri bazalıq stipendiya muǵdarınıń bir esesi hám 3-orın iyeleri bazalıq stipendiya muǵdarınıń yarım esesi muǵdarında sıylıqlandı.

Instituttıń ziyrek studentlerdiń ilimiy-izertlew jumısların shólkemlestiriw bólimi juwapkerleri jeńimpazlar hám sıylı orın iyelerine diplom hám vaucherlerdi tapsırdı.

Onlayn pán olimpiadaların ótkeriw zamanagóy bilimlendiriwdiń ajıralmas bir bólegi bolıp, bul studentlerdiń ilimiy jaqtan rawajlanıwı hám zárúr kónlikpelerdi iyelewine járdem beredi.

NMPI baspasóz xızmeti.