Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Joqarı bilimlendiriw, ilim hám innovaciyalar ministrligi hám Ayrıqsha jaǵdaylar basqarmasınıń birgeliktegi reje-grafigi tiykarında institutta seysmikalıq qáwipsizlikti támiyinlew máseleleri boyınsha taraw wákilleri menen dógerek sáwbeti bolıp ótti.

Ilajdı instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov basqarıp bardı.

Dógerek sáwbetinde Qaraqalpaqstan Respublikası Ayrıqsha jaǵdaylar basqarması Ómir qáwipsizligi oqıw orayınıń aǵa oqıtıwshısı Baxtiyar Táńirbergenov sońǵı waqıtlarda sırt mámleketlerde júz berip atırǵan hár qıylı tábiyiy apatshılıqlar sebepli xalqımız arasında jer silkiniwleri menen baylanıslı ayrıqsha jaǵdaylarda qáwipsizlikti támiyinlew jáne oǵan tayarlıq kóriw boyınsha usı mazmundaǵı úgit-násiyat jumısları ámelge asırılıp atırǵanın atap ótti.

Ilajda taraw qánigesi qatnasıwshılarǵa ayrıqsha jaǵdaylarda durıs háreketleniw boyınsha kónlikpeler berip, arnawlı maǵlıwmatlar jazılǵan tarqatpa materiallardı tarqattı.