Ájiniyaz atındaǵı Nókis mámleketlik pedagogikalıq institutı biologiya qánigeliginiń 1-kurs magistrantı Jalalatdin Usnatdinov «Bolajaq alım» ilimiy ideyalar tańlawında «Mikro suw otların jetistiriw ushın innovaciyalıq fotobioreakt islep shıǵarıw» joybarı menen qatnasıp, jeńimpaz bolǵanı haqqında aldın málim etken edik.

Búgin, 24-yanvar kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov qatnasıwında tańlaw jeńimpazların sıylıqlaw ilajı bolıp ótti.

Ministr institutımız magistrantın jeńimpaz bolǵanı menen qutlıqladı hám sertifikat jáne ilimiy joybarın ámelge asırıw ushın 72 080 000 sum muǵdarında qarjılay sıylıqlardı tapsırdı.

Maǵlıwmat ornında atap ótiw kerek, «Bolajaq alım» respublikalıq tańlawı Ózbekstan Respublikası Ministrler Kabinetiniń «Ilimiy hám innovaciyalıq jumıs penen shuǵıllanıp atırǵan qábiletli jaslardı qollap-quwatlaw ilajları haqqında»ǵı qararı tiykarında Joqarı bilimlendiriw, ilim hám innovaciyalar ministrligi janındaǵı Innovaciyalıq rawajlanıw agentligi hám Jaslar akademiyası tárepinen shólkemlestirildi.

Tańlawdıń tiykarǵı maqseti jaslardıń ilimiy ideyaları hám startap joybarların qollap-quwatlawdan ibarat.

NMPI baspasóz xızmeti.