«Nókis mámleketlik texnika universitetin shólkemlestiriw haqqında»ǵı Prezident qararı (PQ-25-sanlı, 24.01.2025-j.) tastıyıqlandı.

Qararǵa muwapıq, Nawayı mámleketlik kánshilik hám texnologiyalar universiteti janındaǵı Nókis kánshilik institutı hám Tashkent informaciyalıq texnologiyalar universiteti Nókis filialı tiykarında Nókis mámleketlik texnika universiteti shólkemlestiriledi.

Sanaat, texnika-texnologiya, injenerlik tarawları ushın joqarı maǵlıwmatlı qánigeler hám ilimiy-pedagogikalıq kadrlar tayarlaw, qayta tayarlaw hám olardıń qánigeligin arttırıw universitettiń tiykarǵı wazıypalarınıń biri etip belgilendi.

Universitette Aldınǵı injenerlik mektebiniń jumısı shólkemlestiriledi.

2025-2026-oqıw jılına shekem universitette tájiriybe-óndirislik («spin-off») kárxanası shólkemlestiriledi.

2025-2026-oqıw jılınan:

– Universitet studentleriniń pánlerdi ózlestiriw kórsetkishin hám professor-oqıtıwshılardıń jumıs nátiyjeliligin xalıqaralıq tájiriybe tiykarında bahalaw sisteması engiziledi.

– Ámiwdárya injenerlik-texnologiyalar texnikumında injenerlik tarawlarındaǵı kásipler boyınsha kásiplik bilimlendiriw baǵdarlamalarında tolıq mámleketlik grant tiykarında orta buwın kadrların tayarlaw jolǵa qoyıladı.

Házirgi waqıtta bilim alıp atırǵan barlıq studentler oqıwın universitette dawam ettiredi hám pitkeriwshi kurs studentlerine belgilengen tártipte universitet diplomı beriledi.

NMPI baspasóz xızmeti.