Búgin, 29-yanvar kúni Ájiniyaz atındaǵı Nókis mámleketlik pedagogikalıq institutında Rossiya Federaciyasınıń Moskva qalası «Ladomir» ilimiy-baspaxana orayında rus tilinde basıp shıǵarılǵan «Антология каракалпакской поэзии» («Qaraqalpaq poeziyasınıń antologiyası») toplamınıń birinshi tomınıń prezentaciya keshesi bolıp ótti.

Ilajǵa Qaraqalpaqstan Jazıwshılar awqamınıń baslıǵı, Ózbekstan xalıq jazıwshısı, Qaraqalpaqstan xalıq shayırı Keńesbay Kárimov, instituttıń Túrkiy tiller fakulteti professor-oqıtıwshıları hám ádebiyatqa ayrıqsha ıqlas qoyǵan student-jaslar qatnastı.

Prezentaciya keshesinde instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov sózge shıǵıp, sońǵı jıllarda Rossiya hám Ózbekstan arasında sawda-ekonomikalıq tarawlardaǵı birge islesiwler menen bir qatarda mádeniy, ádebiy hám ilimiy baǵdardaǵı baylanıslardıń da rawajlanıp atırǵanlıǵı, dóretiwshi tulǵalar, belgili jazıwshı hám shayırlarımızdıń shıǵarmaların rus hám basqa da tillerge awdarıw arqalı dúnyaǵa keńnen tanıtıw boyınsha ámelge asırılıp atırǵan jumıslardıń áhmiyeti haqqında aytıp ótti.

Bunnan soń Qaraqalpaqstan Jazıwshılar awqamınıń baslıǵı Keńesbay Kárimov «Антология каракалпакской поэзии» toplamınıń birinshi tomın tanıstırıp, onda qaraqalpaq xalıq dástanları «Qırıq qız», «Qoblan», «Sháryar» hám xalıq qosıqları, sonıń ishinde, balalar folklorı úlgileriniń rus tiline awdarmaları orın alǵanlıǵın atap ótti.

Toplamdı baspaǵa tayarlawda rossiyalı belgili shayır hám dilmash, ádebiyat tariyxshısı Mixail Sinelnikov, Ózbekstannıń Rossiyadaǵı elshixanası, Ózbekstan hám Qaraqalpaqstan Jazıwshılar awqamları, Rossiyadaǵı qaraqalpaq diasporasınıń belsendi aǵzaları qatnasqan bolsa, onı toplam etip basıp shıǵarıwǵa túp-tiykarı ózbekstanlı isbilermen Alisher Usmanovtıń «Kórkem óner, ilim hám sport» qayırqomlıq qorı qarjılay kómek berdi.

Dástanlar hám xalıq qosıqların rus tiline awdarıwda belgili dilmashlar Arseniy Tarkovskiy, Sergey Severcev, Naum Grebneb hám Saǵınbay Ibragimovlardıń xızmetlerin ayrıqsha atap ótiw orınlı.

Qaraqalpaqstan Jazıwshılar awqamınıń baslıǵı Keńesbay Kárimov óz sózinde toplamnıń ekinshi tomı da baspaǵa tayarlanıp atırǵanlıǵın, onda qaraqalpaq ádebiyatınıń XVIII-XIX ásirlerden baslap búgingi kúnge shekemgi dóretiwshileriniń shıǵarmaları orın alǵanlıǵın málim etti.

Toplamnıń prezentaciya keshesinde institut professor-oqıtıwshıları shıǵıp sóylep, qaraqalpaq ádebiyatın dúnya xalıqlarına tanıstırıw hám keleshek áwladlarǵa jetkerip beriw, xalıqlarımız arasında mádeniy-ádebiy baylanıslardı bekkemlewge xızmet etip atırǵan barlıq pidayı insanlarǵa minnetdarshılıq bildirdi.

Ilajda Qaraqalpaqstan Jazıwshılar awqamınıń baslıǵı «Антология каракалпакской поэзии» toplamınıń birinshi tomın, sonday-aq, jaqında baspadan shıǵarılǵan «Baburnama» kitabı hám «Ótken kúnler» romanınıń qaraqalpaq tilindegi awdarmaların instituttıń málimleme-resurs orayına sawǵa etti.

NMPI baspasóz xızmeti.