Búgingi kúnde jaslar arasında náshebentlik hám psixotrop zatlardıń tarqalıwı globallıq mashqalaǵa aylandı. Bul illetler tek ǵana insannıń densawlıǵına zıyan jetkerip qoymastan, jaslardıń keleshegin de qáwip astında qaldıradı.

Búgin, 3-fevral kúni Ájiniyaz atındaǵı Nókis mámleketlik pedagogikalıq institutında jaslar arasında náshebentlik hám psixotrop zatlardıń tarqalıwınıń aldın alıw aylıǵı sheńberinde taraw wákilleri menen ushırasıw bolıp ótti.

Ilajda Ózbekstan Respublikası Ishki isler ministrligi Operativ-izlew departamenti Jınayat-izlew xızmeti basqarma baslıǵınıń orınbasarı A.Matlyubov, Jınayat-izlew xızmeti ayrıqsha isler boyınsha operativ wákili A.Aljanov, sonday-aq, usı basqarmanıń juwapker xızmetkerleri jaslar menen sáwbetlesiw ótkerdi.

Taraw wákilleri tárepinen atap ótilgenindey, elimizde jınayatshılıqqa qarsı gúresiw hám huqıqbuzarlıqlardıń aldın alıw baǵdarındaǵı jumıslardı muwapıqlastırıw, xalıqtıń huqıqıy mádeniyatı hám sanasın jetilistiriw, bul baǵdarda mámleketlik strukturalardıń bilimlendiriw mákemeleri, puqaralıq jámiyetiniń institutları, ǵalaba xabar quralları menen óz ara nátiyjeli birge islesiwin shólkemlestiriw menen baylanıslı anıq wazıypalar belgilengen bolıp, Jınayat kodeksiniń 270-276-statyaları menen náshebentlik zatlar, olardıń analogları hám psixotrop zatlardı nızamǵa qayshı túrde paydalanıw ushın jınayıy juwapkershilik belgilengen. BMShnıń maǵlıwmatlarına bola, náshebentlik awır hám oǵada awır jınayatlardıń júz beriwine, shańaraqlar hám millet genofondınıń buzılıwına sebepshi bolmaqta.

Sońǵı jıllarda náshebentlik hám psixotrop zatlardan paydalanıw kórsetkishleriniń jaslar arasında artıp baratırǵanlıǵı bul baǵdardaǵı profilaktikalıq jumıslardıń nátiyjeliligin arttırıwdı talap etpekte. Ótken jılı náshebentlik hám psixotrop zatlar menen baylanıslı 185 adam jınayıy juwapkershilikke tartılǵan bolsa, sonnan 38 adam 30 jasqa tolmaǵan jaslar ekenligi taraw xızmetkerlerin, ulıwma keleshegimizge biyparıq bolmaǵan hár kimdi tereń oyǵa saladı.

Ilajda qánigeler jaslardıń pikir-usınısların tıńlap, sorawlarına juwap berdi.

Ushırasıw dawamında náshebentlik hám psixotrop zatlardıń unamsız aqıbetleri haqqında sóz etetuǵın videorolik studentlerdiń názerine usınıldı.

Ilaj instituttıń talantlı studentleri hám «Tumaris» xalıq ansambli atqarıwındaǵı koncert baǵdarlaması menen dawam etti.

NMPI baspasóz xızmeti.