Házirgi waqıtta Qaraqalpaqstan Respublikası Ministrler Keńesi Baslıǵınıń orınbasarı Bayrambay Otemuratov basshılıǵındaǵı delegaciya aǵzaları xızmet saparı sheńberinde Malayziya mámleketinde bolıp turıptı.

Delegaciya quramında Qaraqalpaqstan Respublikası Mádeniyat ministri B.Temirbaev, Sanlı texnologiyalar ministrligi Qaraqalpaqstan Respublikası aymaqlıq basqarması baslıǵı T.Bayekeev, Berdaq atındaǵı Qaraqalpaq mámleketlik universiteti rektorı A.Reymov hám xalıqaralıq birge islesiw boyınsha prorektorı T.Nurımbetov, Ájiniyaz atındaǵı Nókis mámleketlik pedagogikalıq institutınıń ilimiy isler hám innovaciyalar boyınsha prorektorı R.Eshmuratovlar qatnaspaqta.

Sapardıń dáslepki kúni delegaciya aǵzaları Aziya-Tınısh okeanı texnologiyalar hám innovaciyalar universiteti (APU) jámááti menen ushırastı. Ushırasıw dawamında studentler almasıw baǵdarlamaların shólkemlestiriw, professor-oqıtıwshılardı stajirovkaǵa jiberiw, sonday-aq, IT tarawı boyınsha birgeliktegi ilimiy-ámeliy joybarlar ústinde islesiw máseleleri hár tárepleme dodalandı. Bul sapar zamanagóy texnologiyalar hám innovaciyalar tarawındaǵı aldınǵı tájiriybelerdi úyreniw, maman kadrlar tayarlaw hám akademiyalıq baylanıslardı bekkemlew ushın áhmiyetli bolıp tabıladı.

Delegaciya aǵzaları tárepinen alǵa qoyılǵan baslamalardan biri studentler almasıw baǵdarlamaların keńeytiw boldı. Bul arqalı Qaraqalpaqstannıń qábiletli jasları APU universitetinde zamanagóy bilim alıw hám ilimiy tájiriybe arttırıw imkaniyatına iye boladı. Sonıń menen birge, professor-oqıtıwshılar ushın tájiriybe almasıw hám qánigeligin arttırıw baǵdarlamaları da kórip shıǵıldı.

APU universitetinde qánigeligin arttırǵan pedagoglar zamanagóy bilimlendiriw metodikaların ózlestirip, óz bilim hám tájiriybelerin jergilikli joqarı bilimlendiriw sistemasına qollanıwı atap ótildi. Sonday-aq, IT tarawı boyınsha birge islesiw ayrıqsha itibarǵa alınıp, Malayziya universiteti hám Qaraqalpaqstan Respublikasındaǵı joqarı oqıw orınları arasında sanlı texnologiyalar, programmalıq támiynat jaratıw, xalıqaralıq IT konferenciyaları hám startap joybarlarında qatnasıw imkaniyatları haqqında sáwbetlesiwler alıp bardı.

Maǵlıwmat ushın, APU universiteti 2025-jılǵı QS dúnya universitetleri reytinginde 611-620-orınlardı iyeledi. Sonday-aq, bul universitet QS tárepinen «5 Stars Plus» reytingine iye bolǵan Malayziyadaǵı birinshi universitet bolıp esaplanadı.