Búgin, 3-fevral kúni Ájiniyaz atındaǵı Nókis mámleketlik pedagogikalıq institutı rektorı Quvondiq Qodirov fakultetler hám kafedralardıń ilimiy-pedagogikalıq, investiciyalıq hám oqıw-tárbiyalıq baǵdardaǵı jumısların 2025-jılda rawajlandarırıw boyınsha islep shıǵılǵan jol kartasında belgilengen wazıypalardıń orınlanıwı boyınsha ámelge asırılıp atırǵan jumıslardı kórip shıqtı.

Xabarıńız bar, joqarı oqıw orınlarında oqıw procesin jetilistiriw, sanlastırıw hám bilimlendiriwdiń sapasın, ilimiy-izertlewlerdiń nátiyjeliligin arttırıw, ilim, bilimlendiriw hám óndiristiń integraciyasın keńeytiw, sociallıq-ruwxıy ortalıqtı salamatlastırıw, student-jaslarda tárbiyalıq jumıslar sistemasın jetilistiriw hám olardıń bos waqıtların mazmunlı shólkemlestiriw, materiallıq-texnikalıq támiynat, oqıw laboratoriyaların zamanagóy ásbap-úskeneler menen támiyinlew, sırt el bilimlendiriw hám izertlew mákemeleri menen birge islesiw baylanısların jolǵa qoyıw boyınsha ámelge asırılıp atırǵan jumıslar Respublikalıq jumısshı topar tárepinen úyrenilip, tiyisli usınıslar bildirilgen edi.

Sonıń menen birge, Qaraqalpaqstan Respublikası Joqarǵı Keńesi tárepinen respublikamızdaǵı joqarı oqıw orınların rawajlandırıw boyınsha jol kartası islep shıǵılıp, tastıyıqlanǵan edi.

Usı tiykarda institutta hár bir fakultet hám kafedralardıń jumısların jetilistiriwge baǵdarlanǵan jol kartaları islenip, ámeliy jumıslar baslap jiberildi.

Institut rektorı jol kartası tiykarında islenip atırǵan jumıslar hám ondaǵı baslı baǵdarlar boyınsha óz usınısların bildirip, juwapkerlerge tiyisli tapsırmalar berdi.

NMPI baspasóz xızmeti.