Ájiniyaz atındaǵı Nókis mámleketlik pedagogikalıq institutında jaslardıń kitapqumarlıq mádeniyatın hám oratorlıq sheberligin arttırıw, logikalıq-sociallıq oylaw, pikirlerin emin-erkin jetkerip beriw dárejesin rawajlandırıw hám olardıń bos waqıtların mazmunlı ótkeriw maqsetinde «Rektor kubogi» ushın jeńimpazlıǵı shólkemlestirilgen «Debat» intellektual oyınınıń final basqıshı bolıp ótti.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov sózge shıǵıp, jaslar arasında intellektual oyınlardı ǵalabalastırıwdıń áhmiyetine toqtaldı hám barlıq qatnasıwshılarǵa tabıslar tiledi.

Finalda barlıq basqıshlardan tabıslı ótken Baslawısh tálim fakultetiniń «Primary» hám Tariyx fakultetiniń «Turan» komandaları jeńimpazlıq ushın óz imkaniyatların sınaqtan ótkerdi.

Final oyınında qatnasıwshılar «Sociallıq tarmaqlardıń jaslar sanasına tásiri» tematikası boyınsha tastıyıqlawshı hám biykarlawshı poziciyalarda óz bilim hám kónlikpeleri, toplaǵan maǵlıwmatları hám oratorlıq sheberliklerin kórsetiwge háreket etti.

Solay etip, oǵada qızǵın túrde ótken final oyını juwmaǵında Baslawısh tálim fakultetiniń «Primary» komandası jeńimpaz dep tabılıp, «Debat» intellektual oyını boyınsha «Rektor kubogi» jeńimpazı boldı.

Tariyx fakultetiniń «Turan» komandası 2-orındı, al Dene mádeniyatı fakultetiniń «Imperiya» komandası sıylı 3-orındı iyeledi.

Jeńimpaz bolǵan hám sıylı orınlardı iyelegen komandalardıń aǵzalarına diplomlar, institut kásiplik awqamı komiteti atınan bahalı sawǵalar, sonday-aq, Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi tárepinen kitaplar tapsırıldı.

NMPI baspasóz xızmeti.