Búgin, 14-fevral kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Joqarǵı Keńesi tárepinen jańa redakciyadaǵı Miynet kodeksi boyınsha qánigelerdiń jumısın shólkemlestiriw hám miynetke baylanıslı hújjetlerdi rásmiylestiriw máselelerine arnalǵan oqıw-seminarı bolıp ótti.

Ilajǵa respublikamızdaǵı ministrlik, mákeme hám shólkemlerdiń yuridikalıq, kadrlar hám kásiplik awqamları máseleleri boyınsha juwapker qánigeleri, qala hám rayonlardıń shólkemlestiriw-kadrlar toparı basshıları jáne huqıqıy másláhátshileri qatnastı.

Oqıw-seminarında Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev sózge shıǵıp, tarawlarda jumıs islep atırǵan xızmetkerlerdiń miynetke baylanıslı huqıq hám máplerin qorǵaw, olarǵa múnásip miynet sharayatların jaratıp beriw baǵdarında ámelge asırılıp atırǵan jumıslar hám orın alıp atırǵan mashqalalardı atap ótti.

Oqıw-seminarında Qaraqalpaqstan Respublikası Ádillik ministrligi, sud uyımları, Kámbaǵallıqtı qısqartıw hám bántlik ministrligi, Ózbekstan kásiplik awqamları Federaciyasınıń Qaraqalpaqstan Respublikası Keńesiniń juwaplı qánigeleri miynet shártnamaların dúziw, ózgertiw hám biykar etiw tártipleri, mashqalalı máselelerdi sudta kórip shıǵıw, kásiplik awqamı komitetleriniń miynet shártnamasın biykar etiwdegi roli sıyaqlı máseleler boyınsha qatnasıwshılarǵa tolıq maǵlıwmatlar hám kónlikpeler berdi.

Ilajda qatnasıwshılar kún tártibindegi máseleler boyınsha sorawlarına juwaplar aldı.

NMPI baspasóz xızmeti.