Ájiniyaz atındaǵı Nókis mámleketlik pedagogikalıq institutı málimleme-resurs orayı sırt el málimleme-kitapxana resursları menen islesiw bólimi tárepinen belgili mámleketlik ǵayratker, sheber áskerbasshı, ullı shayır, tariyxshı ilimpaz sıpatında mámleketimiz hám dúnya xalıqları tariyxında óshpes iz qaldırǵan Zahiriddin Muhammed Baburdıń tuwılǵanına 542 jıl tolıwına arnalǵan «Watan saǵınıshında ótken shayır» atamasındaǵı ádebiy keshe shólkemlestirildi.

Ádebiy keshege ózbek ádebiyatı kafedrasınıń docenti, filologiya ilimleri boyınsha filosofiya doktorı (PhD) Hamza Allambergenov, málimleme-resurs orayınıń direktorı Gúlayım Jiyemuratova, sırt el málimleme-kitapxana resursları menen islesiw bóliminiń baslıǵı Rita Amanbaeva, Mektepke shekemgi tálim fakultetiniń tyutorları Gúljáhán Artikova hám Uljan Qudaybergenova, sonday-aq, tyutorlar jáne studentler qatnastı.

Ilajda sózge shıqqanlar Zahiriddin Muhammed Baburdıń ómiri, dóretiwshiligi hám dúnya xalıqları tariyxı, mádeniyatı hám ádebiyatında tutqan ornı haqqında bahalı maǵlıwmatlar berdi.

Onıń 1494-1529-jıllardaǵı waqıyalardı óz ishine alǵan tariyxıy-memuarlıq shıǵarması «Baburnama» hám onıń mazmunı, áhmiyeti tuwralı pikir almasıldı.

Ádebiy keshede studentler tárepinen Babur shıǵarmalarınan úzindiler oqılıp, saxnalıq kórinisler qatnasıwshılardıń názerine usınıldı hám muzıkalıq-kórkem bólim menen dawam etti.

NMPI baspasóz xızmeti.