Ájiniyaz atındaǵı Nókis mámleketlik pedagogikalıq institutında 2025-jıldan baslap ilimiy-pedagogikalıq, oqıw-tárbiyalıq hám innovaciyalıq baǵdarda alǵa qoyǵan joqarı maqsetlerge erisiwdiń nátiyjeliligin arttırıw maqsetinde institut rektorı Quvondiq Qodirovtıń baslaması menen professor-oqıtıwshılar arasında KPI (Key Performance Indicators) bahalaw sisteması engizilmekte.

Oqıw isleri boyınsha prorektor Muxtar Ibragimov basshılıǵında sanlı bilimlendiriw texnologiyaları orayı tárepinen bul boyınsha respublikamız hám sırt ellerdegi aldınǵı joqarı oqıw orınlarınıń tájiriybesi tereń analizlenip, arnawlı platforma islep shıǵıldı hám birneshe márte dodalawlar ótkerilip, institut Keńesinde tastıyıqlandı.

Bul platformanıń áhmiyetin professor-oqıtıwshılar arasında keń túrde túsindiriw maqsetinde sanlı bilimlendiriw texnologiyaları orayı tárepinen barlıq fakultetler kesiminde seminarlar shólkemlestirildi.

Ótkerilgen seminarlar dawamında KPI bahalaw sisteması boyınsha professor-oqıtıwshılardıń pikir-usınısları da tıńlanıp, olar tiykarında ámeliy jumıslar alıp barıw belgilep alındı.

Maǵlıwmat ornında atap ótiw kerek, KPI (Key Performance Indicators) bahalaw sisteması – bul shólkem yamasa kompaniyanıń maqsetlerine erisiwdegi nátiyjeliligin bahalaw hám baqlaw ushın qollanılatuǵın kórsetkishler sisteması esaplanadı. KPI sisteması járdeminde shólkemler óz jumısların bahalap, maqsetlerge qalay erisip atırǵanın baqlap barıwı múmkin boladı.