Ájiniyaz atındaǵı Nókis mámleketlik pedagogikalıq institutında jaslar arasında hár qıylı juqpalı keselliklerdiń aldın alıw, AIJS hám AIV infekciyasına qarsı gúresiw máselelerine arnalǵan ushırasıw bolıp ótti.

Ushırasıwǵa Qaraqalpaqstan Respublikası AIJSke qarsı gúresiw orayı shıpakerleri Dilfuza Taxirova hám Aqgúlay Pirmanova, instituttıń zoologiya, adam morfofiziologiyası hám onı oqıtıw metodikası kafedrasınıń úlken oqıtıwshısı Lola Romanova, fakultet dekanlarınıń orınbasarları, tyutorlar hám studentler qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov basqarıp bardı.

Ushırasıwda taraw wákilleri tárepinen jaslar arasında AIJS hám AIV infekciyasına shatılıw jaǵdaylarınıń aldın alıw boyınsha ámelge asırılıp atırǵan jumıslar haqqında maǵlıwmatlar berilip, jaslarǵa bul illetten awlaq júriw, óz salamatlıǵın qorǵaw ushın nelerge áhmiyet qaratılıwı kerek ekenligi túsindirildi.

Jaslarǵa bunday zıyanlı illetlerden saqlanıwı boyınsha profilaktikalıq kónlikpeler berildi.

Ásirese, bunda eń dáslep hár bir studenttiń psixologiyalıq jaǵdayın jaqsılap, bul illetlerdiń zıyanlı aqıbetleri haqqında túsinik hám oǵan qarsı psixologiyalıq immunitet payda etiw eń nátiyjeli jol ekenligi atap ótildi.

NMPI baspasóz xızmeti.