Ájiniyaz atındaǵı Nókis mámleketlik pedagogikalıq institutında Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi menen birgelikte joqarı oqıw orınlarınıń belsendi student-jasları qatnasıwında oqıw-seminarı shólkemlestirildi.

Seminarǵa Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, respublikamızdaǵı joqarı oqıw orınlarınıń «Debat» intellektual klublarınıń aǵzaları hám belsendi student-jasları qatnastı.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov sózge shıǵıp, elimizde jaslardıń intellektuallıq potencialın arttırıw, olardıń qábiletlerin júzege shıǵarıw hám baslamaların qollap-quwatlaw baǵdarında ámelge asırılıp atırǵan jumıslar haqqında aytıp ótti.

Oqıw-seminarında Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov Qaraqalpaqstan Respublikası Ruwxıylıq hám aǵartıwshılıq Keńesiniń májilis protokolı tiykarında jaslardıń kitapqumarlıq mádeniyatın arttırıw, logikalıq-sociallıq oylaw dárejesin rawajlandırıw, joqarı oqıw orınlarındaǵı student-jaslar arasında sheber túrde debat alıp baratuǵın jaslardı anıqlaw maqsetinde usı ilaj ótkerilip atırǵanın atap ótip, aldaǵı waqıtlarda birgelikte ámelge asırılatuǵın jumıslar haqqında jaslardıń pikir-usınısların tıńladı.

«Debat» intellektual turnirin joqarı dárejede shólkemlestiriw arqalı jaslardıń sociallıq mashqalaların sheshiw boyınsha Keńeske usınıslar tayarlaw tiykarǵı maqsetlerdiń biri bolıp tabıladı.

NMPI baspasóz xızmeti.