Paytaxtımızdaǵı Nókis transport texnikumında «Qorshaǵan ortalıqtı qorǵaw hám «jasıl ekonomika» jılı» múnásibeti menen orta-arnawlı bilimlendiriw mákemeleriniń oqıwshı-jasları arasında «Siz ekologiyalıq nızamlardı bilesiz be?» atamasındaǵı tańlawdıń Qaraqalpaqstan Respublikası basqıshı bolıp ótti.

Tańlawda qatnasıwshılar sálemnama, intellektual soraw-juwap, saxnalıq kórinis, ekologiya boyınsha joybar islep shıǵıw sıyaqlı shártler tiykarında ózleriniń ekologiyalıq bilim hám kónlikpelerin, saxnalıq sheberliklerin, tapqırlıǵı hám ziyrekligin kórsetiwge háreket etti.

Quwanıshlı tárepi, tańlawda Ájiniyaz atındaǵı Nókis mámleketlik pedagogikalıq institutı akademiyalıq liceyiniń qábiletli oqıwshı-jaslarınan quralǵan «Qaratal» komandası barlıq shártler boyınsha joqarı nátiyje kórsetip, 1-orındı iyeledi hám tańlawdıń Qaraqalpaqstan Respublikası basqıshınıń jeńimpazı sıpatında respublikalıq basqıshqa jollama aldı.

Akademiyalıq licey oqıwshıların qolǵa kirgizgen tabısları menen qutlıqlap, respublikalıq basqıshta áwmet tileymiz!