Ózbekstan Respublikası Ilimler akademiyası Áliysher Nawayı atındaǵı Ózbek tili, ádebiyatı hám folklorı institutı ádebiyat teoriyası bóliminiń baslıǵı, filologiya ilimleriniń doktorı, professor B.Tuxliev hám Ózbekstan Milliy universiteti ózbek ádebiyattanıwı kafedrasınıń professorı, filologiya ilimleriniń doktorı N.Rahmonovlar Túrkiy tiller fakulteti studentleri hám magistrantları menen ushırastı.

Professor N.Rahmonov ózbek tili hám ádebiyatı tálim baǵdarı studentlerine «Ózbek ádebiyatı», «Tekstti túsindirip oqıw», «Ózbek ádebiyatın oqıtıw metodikası» pánlerinen, professor B.Tuxliev ózbek tili hám ádebiyatı qánigeligi 2-kurs magistrantlarına «Arnawlı pánlerdi oqıtıw metodikası» páninen lekciya hám ámeliy shınıǵıwlar shólkemlestirdi.

Sonday-aq, Túrkiy tiller fakultetinde student-jaslar qatnasıwında ushırasıwlar shólkemlestirildi. Onda studentler kurs jumısı hám pitkeriw-qánigelik jumısı temaları, olardı sáwlelendiriw hám tallaw usılları haqqında professor-oqıtıwshılardan másláhátler aldı.