Ájiniyaz atındaǵı Nókis mámleketlik pedagogikalıq institutında T.N.Qori Niyoziy atındaǵı Ózbekstan Pedagogika ilimleri ilimiy-izertlew institutınıń direktorı, akademik Xolboy Ibraimov penen ushırasıw bolıp ótti.

Dáslep akademik instituttaǵı Ájiniyaz muzeyinde bolıp, bul jerdegi eksponatlar menen tanıstı. Bunnan soń institutta jaslardıń oqıwı, bilim alıwı, teoriyalıq bilimlerin bekkemlewi ushın jaratılǵan sharayatlardı kózden ótkerip, laboratoriyalar, málimleme-resurs hám IT-inkubaciyalıq oraylardıń jumıslarına joqarı baha berdi.

Ilaj «Akademik hám jaslar» atamasındaǵı ushırasıw menen dawam etti.

Onda sózge shıqqanlar bul ilaj ilimiy, sociallıq hám mádeniy tarawlarda pikir almasıw, tájiriybe hám bilimler menen bólisiwde úlken áhmiyetke iye ekenligin atap ótip, akademik hám jas izleniwshiler, studentler arasında baylanıs ornatıwdıń nátiyjeli usılı ekenligine ayrıqsha toqtaldı.

Haqıyqatında da, bunday ushırasıwlar jaslardıń ilimiy potencialın arttırıw, olardı ilim, texnologiya, innovaciya hám sociallıq rawajlanıw tarawlarındaǵı jańalıqlar menen tanıstırıwda úlken áhmiyetke iye. Ushırasıwda akademik Xolboy Ibraimov jaslarǵa óz tájiriybeleri haqqında aytıp berip, olarǵa ilim jolında óz ornın tabıwı ushın másláhátler berdi.

Bunnan soń akademik institut professor-oqıtıwshıları hám institut átirapındaǵı mákan puqaralar jıyınlarınıń turǵınları menen sáwbetlesip, olar menen ilimiy-izertlew jumısları menen birge sociallıq máseleler, ekologiya, turaqlı rawajlanıw sıyaqlı áhmiyetli máseleler boyınsha da pikir almasıldı.

Ótkerilgen ushırasıwlar dawamında akademik jaslarǵa, professor-oqıtıwshılar hám aymaq turǵınları bolǵan jasıúlken nuranıylarǵa kitaplar sawǵa etti.

NMPI baspasóz xızmeti.