Ájiniyaz atındaǵı Nókis mámleketlik pedagogikalıq institutında 25-fevral – Júweri gúrtik kúni joqarı shólkemleskenlik penen ótkerilmekte.

Instituttıń «Argoniya» juwapkershiligi sheklengen jámiyeti menen mámleketlik-jeke menshik sheriklik tiykarında shólkemlestirilgen studentler turaq jayında bayram múnásibeti menen qaraqalpaq xalqınıń milliy taǵamı – júweri gúrtik tayarlandı.

Studentler turaq jayı direktorı Miywagúl apa Qallibekovanıń baslaması menen bul bayram úsh jıldan berli turaqlı túrde joqarı keypiyatta belgileniwi dástúrge aylanǵan.

– Hár jılı studentler turaq jayında usı bayramdı belgilep, studentler menen birgelikte júweri gúrtik tayarlap, ata-babalarımızdan miyras bolıp kiyatırǵan úrp-ádetler, dástúrler hám qádiriyatlar haqqında sáwbetlesemiz, óz ara pikir almasıp, tariyxımız jáne mádeniyatımız haqqında maǵlıwmatlar beremiz. Bul bayram wálayatlardan kelgen studentler arasında da oǵada qızıǵıwshılıq payda etedi. Olar qaraqalpaq xalqınıń milliy taǵamı júweri gúrtik hám onıń tayarlanıwı haqqında maǵlıwmatlarǵa iye boladı. Álbette, bul bayram arqalı biz elimizdiń ózine tán mádeniyatı, tariyxı, salt-dástúrleri hám milliy taǵamımız esaplanǵan júweri gúrtikti dúnya júzine tanıtıwǵa úles qosamız, – deydi Miywagúl apa biz benen sáwbette.

Bayram keshesine instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov qatnasıp, jaslarımız arasında usınday milliyligimizdi úgit-násiyatlawǵa úles qosıp atırǵan studentler turaq jayı jámáátine hám pedagog-tárbiyashılarına minnetdarshılıq bildirdi.

Bayram ilajında institut studentleri milliy kiyimlerde xalqımızdıń qız-jigitler aytısın ótkerip, sonıń menen birge, milliy dástúrlerimiz, olardıń tariyxı haqqında bahalı maǵlıwmatlarǵa iye boldı.

Ilaj sheńberinde studentler turaq jayı jámááti, jasıúlken apalar hám jaslar birgelikte milliy taǵam – júweri gúrtikti tayarlap, bayram dasturqanına tarttı.

Maǵlıwmat ornında atap ótiw kerek, 2023-jıldan baslap Qaraqalpaqstan Respublikasında 25-fevral jámiyetlik baslama tiykarında «Júweri gúrtik kúni» sıpatında xalqımız arasında keń túrde belgilenip kelinbekte.

Hár jılı usı sánede xalqımız úlken awızbirshilik úlgisin kórsetip, tek ǵana shańaraqlarda dasturqan átirapında emes, sonıń menen birge, miynet jámáátleri, oqıw orınları, kafe hám restoranlarda da joqarı kóterińkilik penen ótkerilmekte.

Álbette, bunday baslamalar ata-babalarımızdan miyras bolıp kiyatırǵan dástúrlerdi keleshek áwladlarǵa jetkeriwde ayrıqsha áhmiyetke iye bolmaqta.

NMPI baspasóz xızmeti.