Ájiniyaz atındaǵı Nókis mámleketlik pedagogikalıq institutı málimleme-resurs orayında matematikanı oqıtıw metodikası kafedrasınıń docenti Sadıq Táńirbergenovtıń «Analitikalıq geometriya hám sızıqlı algebra» atamasındaǵı oqıw qollanbasınıń prezentaciya keshesi bolıp ótti.

Ilajǵa oqıw qollanbanıń avtorı hám onıń shákirti, docent Tamara Qálekeeva, Fizika-matematika fakultetiniń studentleri jáne oray qánigeleri qatnastı.

Keshede málimleme-resurs orayınıń direktorı Gúlayım Jiyemuratova sózge shıǵıp, elimizde ilim-bilimlendiriw tarawında ámelge asırılıp atırǵan reformalar birinshi gezekte zamangóy bilim hám kónlikpelerge iye bolǵan qánigelerdi tayarlawǵa baǵdarlanǵanlıǵı, bunda, álbette, tájiriybeli professor-oqıtıwshılardıń miynetleriniń joqarı ekenligin atap ótti.

Sonıń menen birge, ilaj barısında qatnasıwshılarǵa oqıw qollanbanıń mazmunı haqqında maǵlıwmat berildi.

Bul tiykarǵı oqıw ádebiyatı bakalavriat tálim baǵdarına mólsherlengen bolıp, onda analitikalıq geometriyanıń elementleri vektor hám olar ústinde ámeller, tuwrı sızıq hám onıń teńlemeleri, ekinshi tártipli iymek sızıqlar, betlikler, sızıqlı algebraǵa tiyisli determinantlar, matricalar, sızıqlı teńlemeler sistemasınıń ulıwma teoriyası boyınsha ámeliy túsinikler keltirilgen.

Keshede docent Tamara Qálekeeva hám oraydıń ilimiy-metodikalıq hám málimleme-maǵlıwmat bólimi baslıǵı Zlixa Qaynarovalar avtordıń ómiri, ilimiy-pedagogikalıq xızmetleri, oqıw qollanbanıń áhmiyeti haqqında maǵlıwmatlar berdi.