Búgin, 27-fevral kúni Ájiniyaz atındaǵı Nókis mámleketlik pedagogikalıq institutı baspasóz xızmeti tárepinen respublikalıq hám jergilikli ǵalaba xabar qurallarınıń wákilleri, jurnalistler hám blogerler ushın institutta studentlerdiń teoriyalıq bilimlerin bekkemlew hám ámeliy kónlikpelerin arttırıw maqsetinde shólkemlestirilgen oqıw laboratoriyaları hám ámeliyat oraylarına media-tur shólkemlestirildi.

Institutta studentlerdiń teoriyalıq bilimlerin bekkemlew hám ámeliy kónlikpelerin arttırıw arqalı maman kadrlar bolıp jetisiwi ushın barlıq sharayatlar jaratılǵan.

Media-tur qatnasıwshıları dáslep texnologiyalıq tálim kafedrasınıń oqıw-ustaxanasında boldı. Oqıw-ustaxanası Ózbekstan Respublikası Ministrler Kabinetiniń 2018-jıl 22-noyabrdegi «Islam rawajlanıw bankiniń qatnasıwında «Joqarı bilimlendiriw mákemeleriniń texnikalıq bazasın bekkemlew» joybarın ámelge asırıw ilajları haqqında»ǵı qararınıń orınlanıwı sheńberinde jámi 70 mıń AQSh dollarına shamalas qarjı esabınan zamanagóy ásbap úskeneler menen támiyinlendi.

Bul oqıw-ustaxanasınıń aspazlıq, temir hám aǵashtı qayta islew, tigiwshilik sıyaqlı bólmelerinde studentler teoriyalıq bilimlerin ámeliyat penen bekkemlemekte. Bul jerde oqıw hám ámeliyat sabaqlarınan tısqarı, studentler ushın dógerek jumısları da alıp barıladı. 100 den aslam studentler usı dógereklerde bos waqıtların nátiyjeli ótkermekte. Házirgi waqıtta ustaxanada robototexnika boyınsha ámeliyat bólmesin shólkemlestiriw jumısları kórip shıǵılmaqta.

Tábiyiy pánler fakulteti biologiya tálim baǵdarında bilim alıp atırǵan studentler ushın shólkemlestirilgen oqıw laboratoriyası media-turdıń ekinshi mánzili boldı. Bul jerde studentler, magistrantlar, doktorantlar hám professor-oqıtıwshılardıń laboratoriyalıq jumısların alıp barıwı ushın Islam rawajlanıw banki qarjıları esabınan 592 million sum, sonday-aq, 27 mıń AQSh dolları muǵdarındaǵı eń sońǵı zamanagóy laboratoriyalıq texnikalar hám ásbap-úskeneler alıp kelindi.

Media-tur qatnasıwshıları instituttıń 90 jıllıǵı qarsańında paydalanıwǵa tapsırılǵan jańa oqıw imaratında bolıp, bul jerde Fizika-matematika fakultetiniń mexanika, molekulyarlıq fizika, optika, elektromagnetizm, atom hám elementar bóleksheler fizikası, fizikanı oqıtıw metodikası sabaqlarına arnalǵan laboratoriya xanaları menen tanıstı.

Fakultettegi laboratoriya xanaları 2019-jılı Germaniya Federativ Respublikasınıń «LD Didactic GmbH» kompaniyası tárepinen alıp kelingen ásbap-úskeneler menen támiyinlengen bolıp, professor-oqıtıwshılar laboratoriya sabaqların belgilengen grafik tiykarında ótip, joqarı nátiyjelerge erisip kelmekte. Házirgi waqıtta fakultette atom hám elementar bóleksheler fizikası, astronomiya hám astrofizika pánlerinen laboratoriyalıq jumıslar ushın paydalanatuǵın ásbap-úskenelerdi alıp kelip ornatıw boyınsha ámeliy jumıslar alıp barılmaqta.

Media-tur dawamında jurnalistler hám jámiyetshiliktiń belsendi aǵzalarına oqıw laboratoriyaları menen birgelikte ilimiy laboratoriyalardıń jumısların jolǵa qoyıw baǵdarındaǵı islenip atırǵan jumıslar tuwralı maǵlıwmatlar berildi.

Ájiniyaz atındaǵı Nókis mámleketlik pedagogikalıq institutı baspasóz xızmeti.