Aldın xabar bergenimizdey, usı jıldıń 25-26-fevral kúnleri Ájiniyaz atındaǵı Nókis mámleketlik pedagogikalıq institutında «Studentler teatr studiyaları festivalı» bolıp ótti.

Student-jaslardıń teatr ónerine bolǵan qızıǵıwshılıǵın arttırıw hám ruwxıy jetiklikke baǵdarlaw arqalı ámelge asırılıp atırǵan mádeniy-aǵartıwshılıq jumıslardıń nátiyjeliligin jetilistiriw jáne talantlı jaslarǵa óz imkaniyatların júzege shıǵarıw ushın sharayat jaratıw, sonday-aq, olardı xoshametlew maqsetinde shólkemlestirilgen festivalǵa instituttıń barlıq fakultetlerinen komandalar qatnastı.

Festivaldıń ekinshi kúni Mektepke shekemgi tálim, Dene mádeniyatı, Tábiyiy pánler hám Shet tilleri fakultetleriniń talantlı studentleri gender teńligi hám jámiyette teń huqıqlılıq, jergilikli hám globallıq kelispewshiliklerdiń jaslar turmısına tásiri, qorshaǵan ortalıq hám ekologiyalıq mashqalalar, sociallıq tarmaqlar hám olarda jalǵan maǵlıwmatlardıń tarqalıwınıń jámiyetlik turmısqa keri tásiri haqqında sóz etetuǵın saxnalıq kórinislerin tamashagóylerdiń názerine usındı.

Studentlerdiń saxnalıq sheberlikleri tóreshiler quramı aǵzaları tárepinen bahalandı.

Solay etip, festival juwmaǵında:

1-orın – Fizika-matematika fakulteti;
2-orın – Túrkiy tiller fakulteti;
3-orın – Mektepke shekemgi tálim fakulteti komandasına nesip etti.

Sonıń menen birge, Tariyx fakulteti «Turmıslıq mashqalalardı atqarǵanlıǵı ushın», Baslawısh tálim fakulteti «Sociallıq mashqalalardı sáwlelendirgeni ushın», Tábiyiy pánler fakulteti «Ekologiyalıq mashqalanı sáwlelendirgeni ushın», Pedagogika fakulteti «Milliy qádiriyatlardı sáwlelendirgeni ushın», Dene mádeniyatı fakulteti «Jaslar mashqalasın sáwlelendirgeni ushın», Shet tilleri fakulteti «Globallıq mashqalalardı sáwlelendirgeni ushın» sıyaqlı nominaciyalar menen sıylıqlandı.

Pedagogika fakultetiniń studenti Feruza Bekbawlieva «Eń jaqsı hayal roli», Fizika-matematika fakultetiniń studenti Nurmuhammed Saparbaev «Eń jaqsı erkek roli», Túrkiy tiller fakultetiniń studenti Azada Uzaqbergenova «Eń jaqsı aktyorlıq talantı» nominaciyalarınıń jeńimpazı dep tabıldı.

Jeńimpazlar hám sıylı orın iyelerine institut rektoratı tárepinen diplom hám kásiplik awqamı komiteti tárepinen sawǵalar tapsırıldı.

NMPI baspasóz xızmeti.