Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı rektorı Quvondiq Qodirov xızmet saparı sheńberinde Qazaqstan Respublikasınıń eń abıroylı joqarı oqıw orınlarınıń biri – Ál-Farabiy atındaǵı Qazaq milliy universitetinda bolıp, universitet Basqarma Baslıǵı – Rektor Janseyit Túymebaev penen birge islesiw memorandumına qol qoydı.

Ushırasıwdan soń rektor Janseyit Túymebaev institut rektorı Quvondiq Qodirovqa universitette ilimiy-óndirislik hám innovaciyalıq joybarlardı ámelge asırıw maqsetinde shólkemlestirilgen «Farabi Hub» innovaciyalıq orayınıń jumısları menen tanıstırdı.

Bul jerdegi keń kólemli maǵlıwmatlardı qayta islew, jasalma intellekt, robototexnika hám basqa da joqarǵı texnologiyalıq tarawlarda qollanılatuǵın texnologiyalar hám úskeneler institut delegaciyası aǵzalarında úlken qızıǵıwshılıq oyattı. Sonıń menen birge, Qıtay Xalıq Respublikası, Franciya hám Germaniya menen birgelikte shólkemlestirilgen innovaciyalıq joybarlar menen tanısıp, institut professor-oqıtıwshıların usı orayda tájiriybe almasıw hám qánigeligin arttırıw hám birgelikte ilimiy-innovaciyalıq izertlewlerdi shólkemlestiriw boyınsha pikir-usınıslar bildirildi.

NMPI baspasóz xızmeti.