Ájiniyaz atındaǵı Nókis mámleketlik pedagogikalıq institutı rektoratı hám kásiplik awqamı komiteti tárepinen 8-mart – Xalıqaralıq hayal-qızlar kúni múnásibeti menen institutta jumıs islep atırǵan hayal-qızlar ushın bayram dasturqanı jayıldı.

Ilajda institut rektorı Quvondiq Qodirov hám Ózbekstan kásiplik awqamı Federaciyasınıń Qaraqalpaqstan keńesi baslıǵı Ulıqbek Jalmenov sózge shıǵıp, elimizde hayal-qızlardıń shańaraqtaǵı, jámiyettegi hám mámleketlik basqarıwdaǵı ornın bekkemlew, olardıń oqıwı, jumıs islewi ilimiy-izertlew hám isbilermenlik penen shuǵılanıwı ushın jaratılıp atırǵan imkaniyatlar haqqında aytıp ótti hám barlıq hayal-qızlardı bayram menen qutlıqladı.

Ilimiy-pedagogikalıq jumıslarda, jaslar tálim-tárbiyasında, sonday-aq, jámiyetlik jumıslarda ayrıqsha belsendilik kórsetip kiyatırǵan bir topar professor-oqıtıwshılar jáne qánigelerge institut rektorınıń húrmet jarlıǵı hám bayram sawǵaları tapsırıldı.

Bunnan soń hayal-qızlar bayram dasturqanına mirát etilip, olarǵa gúller sawǵa etildi.

Muzıkalıq tálim kafedrasınıń oqıtıwshıları hám talantlı studentler, sonday-aq, estrada wákilleriniń atqarıwındaǵı koncert baǵdarlaması bayramǵa ózgeshe sán baǵıshladı.

Hayal-qızlar yoshlı qosıqlarǵa ayaq-oyınǵa túsip, bayramdı kóterińki keypiyatta ótkerdi.

NMPI baspasóz xızmeti.