Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ministrler Keńesiniń Sırtqı biyǵárez kómek qarjıların (grantlar) tartıw hám donorlar menen islesiw bólimi menen birgelikte sırt el investiciyalıq qarjıların tartıw hám eksport kórsetkishlerin arttırıw imkaniyatlarına arnalǵan seminar bolıp ótti.

Ilajǵa Qaraqalpaqstan Respublikası Ministrler Keńesiniń Sırtqı biyǵárez kómek qarjıların (grantlar) tartıw hám donorlar menen islesiw bólimi sociallıq tarawınıń bas qánigesi Begis Sultamuratov, Aymaqlıq ekonomikalıq rawajlandırıwǵa kómeklesiw orayı Qaraqalpaqstan bóliminiń baslıǵı Amangeldi Nurmanbetov, instituttıń Dene mádeniyatı fakulteti jámááti hám tiyisli juwapker qánigeler qatnastı.

Seminarda usı jıldıń yanvar ayında mámleketimiz basshısı tárepinen investiciyalardı keńnen tartıw hám eksporttı arttırıw máselelerine arnalǵan videoselektor jıynalısında berilgen tapsırmalardıń áhmiyeti haqqında maǵlıwmatlar berildi.

Usı wazıypalardan kelip shıǵıp, joqarı oqıw orınlarında sırt el investiciyaları hám grant qarjıların tartıw, sonday-aq, bilimlendiriw eksportın rawajlandırıw máseleleri dodalandı.

Seminar dawamında instituttıń investiciyalardı tartıw imkaniyatları hám orın alıp atırǵan mashqalalar jáne olardıń sheshimleri tuwralı pikir almasıldı.