Berdaq atındaǵı Qaraqalpaq mámleketlik universitetinde 8-mart – Xalıqaralıq hayal-qızlar kúni bayramı múnásibeti menen Qaraqalpaqstan Respublikasındaǵı joqarı oqıw orınlarınıń bilimli, ziyrek hám qábiletli student-qızları arasında matematika páninen «Rektor kubogi» olimpiadası bolıp ótti.

Pán olimpiadasında Ájiniyaz atındaǵı Nókis mámleketlik pedagogikalıq institutı Fizika-matematika fakultetiniń 4-kurs studenti Umida Allayarova sıylı 3-orındı iyeledi hám shólkemlestiriwshiler tárepinen sıylıqlandı.

Pán olimpiadasın shólkemlestiriwden baslı maqset – bilimli hám qábiletli student-qızlardı qollap-quwatlaw, olardıń ilimiy potencialın hám matematika pánine bolǵan qızıǵıwshılıǵın arttırıwdan ibarat bolıp tabıladı.