Ájiniyaz atındaǵı Nókis mámleketlik pedagogikalıq institutında hayal-qızlar másláhát keńesi hám Túrkiy tiller fakulteti tárepinen «Ilimniń rawajlanıwında hayal-qızlardıń ornı» atamasındaǵı ilimiy-ámeliy seminar shólkemlestirildi.

Ilajda institut rektorınıń hayal-qızlar máseleleri boyınsha másláhátshisi Sayyora Bekchanova sózge shıǵıp, házirgi waqıtta mámleketimizde hayal-qızlar bilimlendiriw, texnologiya, medicina, injenerlik, pedagogika, biologiya hám kóplegen tarawlarda belsendilik kórsetip atırǵanın atap ótti. Ásirese, mámleketimiz tárepinen hayal-qızlardıń ilim tarawındaǵı rolin arttırıw ushın keń imkaniyatlar jaratılmaqta. Hayal-qızlardı oqıtıw, olardıń joqarı oqıw orınlarına kiriwin qollap-quwatlaw hám ilimiy-izertlew menen shuǵıllanıwın xoshametlew mámleketlik siyasattıń baslı baǵdarlarınıń biri bolıp tabıladı.

Seminarda professor Alima Pirniyazova, kafedra baslıqları Írıstı Quttımuratova hám Gúlzira Qıdırbaevalar respublikamızda ilimpaz hayal-qızlardı qollap-quwatlaw, dúnyanıń aldınǵı joqarı oqıw orınlarında ilimiy-pedagogikalıq jumıslar, grant hám startap joybarlardı tayarlaw máseleleri boyınsha bayanatlar jasadı.

Ilaj sońında belsendi hayal-qızlar hám professor-oqıtıwshılarǵa institut kásiplik awqamı komiteti tárepinen sawǵalar tapsırıldı.

NMPI baspasóz xızmeti.