Búgin, 15-mart kúni paytaxtımız Nókis qalasında Nawrız ulıwma xalıqlıq bayramı aldınan qala hákimliginiń baslaması tiykarında «Taza qala» akciyası joqarı shólkemleskenlik penen baslanıp ketti.

Elimiz boylap dawam etip atırǵan «Jasıl mákan» ulıwma milliy joybarı sheńberinde «Jańa Ózbekstan – jańa ekomákan» súreni tiykarında ótkerilip atırǵan abadanlastırıw hám kóklemzarlastırıw ilajlarına Ájiniyaz atındaǵı Nókis mámleketlik pedagogikalıq institutınıń miynet jámááti hám student-jaslarınan ibarat úsh mıńǵa shamalas adamlar belsene qatnaspaqta.

Akciya qatnasıwshıları paytaxtımızdıń «Bayterek», «Góne qala», «Shımbay gúzarı», «Jasıl baǵ», «Kók ózek», «Ata mákan», «Amanlıq gúzarı», «Taslaq», «Teleoray», «Aq jaǵıs», «Náwpir», «Samanbay», «Anasay», «Qosbulaq», «Jeke terek», «Juwazshı» sıyaqlı mákan puqaralar jıyınları aymaǵında qorshaǵan ortalıqtı shıǵındı hám jabayı shóplerden tazalaw, jap-salmalardıń boyların, egislik jerlerdi nál egiwge tayarlaw, tereklerdiń túplerin háklew sıyaqlı jumıslardı alıp barmaqta.

Mákan puqaralar jıyınları tárepinen akciya qatnasıwshıları bolǵan jaslar ushın úlken qazanlarda awqatlar tayarlanıp, aymaq turǵınları da ekologiyalıq ilajǵa ózleriniń úleslerin qospaqta.

«Taza qala» akciyası 16-mart kúni de dawam etedi.

NMPI baspasóz xızmeti.