Ájiniyaz atındaǵı Nókis mámleketlik pedagogikalıq institutı jámááti hám student-jasları elimizde ekologiyalıq turaqlılıqtı támiyinlew, qorshaǵan ortalıqtı qorǵaw hám bul arqalı xalıqtıń turmıs tárizin jaqsılawǵa baǵdarlanǵan «Jasıl mákan» ulıwma milliy joybarı sheńberinde abadanlastırıw jáne kóklemzarlastırıw jumısların dawam ettirmekte.

Búgin, 23-mart kúni instituttıń belsendi studentleri qatnasıwında paytaxtımızdaǵı «Shadlı awıl» mákan puqaralar jıyını aymaǵındaǵı ajıratılǵan jer ornında nál egiwge tayarlıq jumısların alıp bardı.

Bul jerde jaslar ustazları basshılıǵında jabayı shóplerden hám shıǵındılardan tazalaw jumısların ámelge asırdı.

– Bıyılǵı báhár máwsiminde «Jasıl mákan» ulıwma milliy joybarı sheńberinde institutımız tárepinen paytaxtımız Nókis qalası hám onıń átirapında «jasıl belbew» payda etiw maqsetinde 11 mıń túp hár qıylı miyweli hám dekorativ terek nállerin otırǵızıw jobalastırılǵan. Álbette, bul arqalı jasıl aymaqlardı keńeytiw, hawanıń sapasın jaqsılaw, globallıq klimat ózgerisleriniń unamsız aqıbetlerin kemeytiw, sonday-aq, xalıqtıń, sonıń ishinde, jaslarımızdıń ekologiyalıq juwapkershiligin arttırıw – biziń tiykarǵı maqsetimiz, – deydi instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov.

Bunday ilajlar tábiyattı qorǵawdıń nátiyjeli usılın payda etiw menen birgelikte, keleshek áwladlarǵa taza hám salamat ortalıqtı qaldırıwǵa tiykar jaratadı.

Institutta akciya sheńberindegi abadanlastırıw ilajları dawam etpekte.

NMPI baspasóz xızmeti.