Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ministrler Keńesi janındaǵı Mámleketlik tildi rawajlandırıw departamenti menen birgelikte «Áliysher Nawayı enciklopediyası» hám «Ózbekstannıń orın atamalarınıń túsindirme sózligi» kóptomlıqları, sonday-aq, «Qaraqalpaqstan Respublikası geografiyalıq atamalarınıń túsindirme sózligi» kitapların keń jámiyetshilikke tanıstırıwǵa arnalǵan ilaj bolıp ótti.

Ilajǵa Qaraqalpaqstan Respublikası Ministrler Keńesi Baslıǵınıń másláhátshisi – Mámleketlik tildi rawajlandırıw departamentiniń baslıǵı Perdeǵaliy Dabılov, instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov, jańadan baspadan shıǵarılǵan kitaplardıń avtorları, professor-oqıtıwshılar hám student-jaslar qatnastı.

Ilajda instituttıń ózbek ádebiyatı kafedrasınıń docentleri Hamza Allambergenov hám Nodira Allambergenovalar Ózbek tilin rawajlandırıw qorı qarjıları esabınan basıp shıǵarılǵan 4 tomlıq «Áliysher Nawayı enciklopediyası» haqqında qatnasıwshılarǵa prezentaciya tárizinde tolıq maǵlıwmat berdi.

Bul kóptomlıq Ózbekstan Respublikası Prezidentiniń qararı tiykarında 2021-2023-jıllar dawamında baspaǵa tayarlanǵan bolıp, ullı shayır hám oyshıl, belgili mámleketlik hám jámiyetlik ǵayratker Áliysher Nawayı jasaǵan XV ásirdiń ekinshi yarımındaǵı Xorasan hám Mawaraunnahrdaǵı tariyxıy, sociallıq, siyasiy, mádeniy hám ádebiy turmıs, shayırdıń ómiri, xızmetleri, jaqınları, dosları, dóretiwshiliginiń ruwxıy sarqılmas bulaǵı, ádebiy miyrası hám onıń dúnya júzilik áhmiyeti, sonday-aq, klassikalıq ádebiyatımız tariyxında tutqan ajıralmas ornı haqqında tolıq maǵlıwmatlar jámlengen.

Enciklopediyadan nawayıtanıwshılıq máseleleri, shayır shıǵarmalarınıń hár qıylı jıllardaǵı basılımları, shet tillerine awdarmaları, elimiz hám dúnya kitapxanaları fondlarında saqlanıp atırǵan qoljazba jáne tasbaspa kitapları, sonday-aq, súwretlew óneri, músinshilik, teatr, kino sıyaqlı kórkem óner túrlerinde Áliysher Nawayı tulǵasınıń sáwlelelendiriliwine baylanıslı maqalalar da orın alǵan. Hár qıylı poeziyalıq janrlarǵa tiyisli shıǵarmalarına sholıw hám analizlerden úlgiler keltirilgen.

Prezentaciya ilajında geografiya ilimleriniń kandidatı, docent Qoshqarbay Seytniyazov eki tomnan ibarat «Ózbekstannıń orın atamalarınıń túsindirme sózligi», geografiya ilimleri boyınsha filosofiya doktorı (PhD) Ómirbay Baltabaev Qaraqalpaqstan Respublikası Ministrler Keńesi janındaǵı Mámleketlik tildi rawajlandırıw departamenti baslaması menen baspadan shıǵarılǵan «Qaraqalpaqstan Respublikası geografiyalıq atamalarınıń túsindirme sózligi» kitapları haqqında maǵlıwmat berdi.

Sózge shıqqanlar atap ótilgen kitaplar házirgi waqıtta geografiyalıq obyekt atamalarınıń mánisi hám mazmunın anıqlaw, sonday-aq, keń jámiyetshilikke jetkeriwde áhmiyetli dárek sıpatında xızmet etetuǵınlıǵın ayrıqsha atap ótti.

«Qaraqalpaqstan Respublikası geografiyalıq atamalarınıń túsindirme sózligi»nde Qaraqalpaqstan aymaǵında jaylasqan qala, rayonlar, awıllar, suw obyektleri, tawlar, qumlar, shóller hám basqa da geografiyalıq atamalar sistemalı túrde úyrenilgen bolıp, hár bir atama boyınsha lingvistikalıq, tariyxıy hám geografiyalıq jaqtan analiz islengen.

Ilajda jańadan baspadan shıǵarılǵan kitaplar haqqında qatnasıwshılar menen pikir almasıldı hám usı kitaplar studentler, magistrantlar, doktorantlar hám professor-oqıtıwshılar tárepinen paydalanıwı maqsetinde instituttıń málimleme-resurs orayı fondına tapsırıldı.

NMPI baspasóz xızmeti.