Búgin, 26-mart kúni paytaxtımız Nókis qalasında joqarı oqıw orınları arasında respublikalıq «Máripat maydanı» tańlawınıń Qaraqalpaqstan Respublikası basqıshı bolıp ótti.

«Dóretiwshiniń ómiri», «Soraw-juwap» hám «Dóretiwshilerdiń ómiri hám shıǵarmasınan teatrlastırılǵan kompoziciya» shártleri boyınsha ótkerilgen tańlawda Ájiniyaz atındaǵı Nókis mámleketlik pedagogikalıq institutınıń «Renessans jasları» komandası 1-orındı iyelep, jeńimpaz boldı hám kelesi basqıshqa jollamanı qolǵa kirgizdi.

Tańlaw elimizde ámelge asırılıp atırǵan keń kólemli reformalarda jaslardıń belsene qatnasın támiyinlew, student-jaslardı iygilikli maqsetlerge ilhamlandırıw, ádebiyattıń tásirsheń kúshinen paydalanıw, ata-babalar miyrasın úyreniw, ullı mádeniyatımızǵa sáykes ullı ádebiyat jaratıw maqsetinde shólkemlestirildi.

Institutımız jaslarına tańlawdıń kelesi basqıshında áwmet tileymiz!

NMPI baspasóz xızmeti.