Usı jıldıń 29-mart kúni Ájiniyaz atındaǵı Nókis mámleketlik pedagogikalıq institutında jańadan qurıp pitkerilgen studentler turaq jayı, sport kompleksi hám úlken sport maydanlarınıń paydalanıwǵa tapsırılıwına arnalǵan saltanatlı ilaj bolıp ótti.

Ilajǵa Qaraqalpaqstan Respublikası Ministrler Keńesi Baslıǵınıń orınbasarı Bayrambay Otemuratov, Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov, ministrlik hám shólkemlerdiń wákilleri, joqarı oqıw orınlarınıń basshıları, institut jámááti, professor-oqıtıwshılar, student-jaslar, keń jámiyetshilik hám ǵalaba xabar qurallarınıń wákilleri qatnastı.

Saltanatlı ilajda sózge shıqqanlar jańa obyektlerdiń Nawrız ulıwma xalıqlıq bayramı hám Ramazan hayıtı qarsańında paydalanıwǵa tapsırılıwı institut jámááti ushın bayram sawǵası bolǵanlıǵın ayrıqsha atap ótti.

Házirgi waqıtta institutta 16 mıńǵa shamalas studentler bilim alıp atırǵan bolıp, olardan 1700 ge shamalas jaslar studentler turaq jaylarına qamtıp alınǵan. Instituttıń jańadan qurıp pitkerilgen usı 3-sanlı studentler turaq jayı 500 orınǵa mólsherlengen bolıp, jaslardıń studentler turaq jayına bolǵan mútájligin qanaatlandırıwǵa xızmet etedi.

Studentler turaq jayınıń qurılısı ushın instituttıń byudjetten tısqarı qarjıları esabınan 23 milliard 704 million sum qarjı ajıratıldı hám qurılıs jumısları sapalı túrde joqarı dárejede alıp barıldı. Bul jerde studentlerdiń oqıwdan bos waqıtların mazmunlı ótkeriwi ushın barlıq sharayatlar bar. Atap aytqanda, málimleme-resurs hám IT orayları, shet tillerin úyreniw hám tigiwshilik dógerekleri, shaxmat klubı, ruwxıylıq bólmeleri jaslardıń bilimleri menen qábiletlerin arttırıwǵa xızmet etiwi sózsiz. Sonıń menen birge, mayıplıǵı bolǵan studentler ushın da arnawlı bólmeler ajıratılıp, zárúr qolaylıqlar jaratılǵan.

Ilaj sheńberinde instituttıń futzal, gandbol hám basketbol sport túrlerine qánigelesken zamanagóy sport kompleksiniń rámziy lentası da kesilip, paydalanıwǵa tapsırıldı.

Atap ótiw orınlı, házirgi waqıtta institutta jaslardı sport hám salamatlıq ilajlarına keńnen tartıw, olar arasında salamat turmıs tárizin úgit-násiyatlawǵa ayrıqsha dıqqat qaratılǵan.

Instituttıń Dene mádeniyatı fakulteti hám sport klubı tárepinen hár bir fakultet kesiminde «Bes baslama olimpiadası», «Studentler ligası», «Universiada» hám «Rektor kubogi» sport jarısları turaqlı ótkeriledi. Jámi 9 sport túri – voleybol, basketbol, futbol, shaxmat, futzal, gandbol, gúres, jeńil atletika hám stol tennisi boyınsha sport dógereklerinde jaslar turaqlı túrde sport penen shuǵıllanbaqta.

Usınday imkaniyatlardan nátiyjeli paydalanıp atırǵan institut jaslarınıń sport baǵdarındaǵı kórsetkishleri de joqarı bolmaqta.

«Universiada» sport jarıslarında sportshı studentlerdiń qolǵa kirgizgen tabısları nátiyjesinde 2019- hám 2023-jıllarda institutqa sport inventarlarınan ibarat Prezident sawǵaları tapsırılǵan bolsa, voleybol hám regbi-7 sport túrleri boyınsha institut studentleri mámleketimizdiń saylandı komandası quramında Aziya hám basqa da xalıqaralıq sport jarıslarında qatnasıp, joqarı nátiyjelerdi qolǵa kirgizip kelmekte. Sonıń menen birge, institut studentleri arasınan Ózbekstan hám Qaraqalpaqstan, Aziya hám jáhán birinshilikleriniń jeńimpazları jetisip shıqpaqta.

Paydalanıwǵa tapsırılǵan bul sport kompleksiniń qurılıs-rekonstrukciya jumısları ushın instituttıń byudjetten tısqarı qarjıları esabınan 4 milliard 438 million sum ajıratıldı.

Saltanatlı ilaj sheńberinde instituttıń futbol, jeńil atletika hám basketbol sport túrlerine qánigelesken úlken sport maydanı da paydalanıwǵa tapsırıldı. Ulıwma 300 tamashagóy ornına iye bolǵan sport maydanı instituttıń jańa oqıw imaratı artındaǵı bos turǵan jer maydanında qurılǵan bolıp, bul jerde 6 milliard 199 million sumlıq qurılıs-ońlaw jumısları sheber qurılısshılar tárepinen alıp barıldı. Bul sport obyektleri institutta sport penen turaqlı shuǵıllanatuǵın student-jaslardıń sanın bunnan bılay da arttırıwǵa xızmet etedi.

Ilaj qatnasıwshıları paydalanıwǵa tapsırılǵan jańa obyektlerde jaratılǵan sharayatlar hám imkaniyatlar menen tanıstı.

Nókis mámleketlik pedagogikalıq institutı baspasóz xızmeti.