Búgin, 2-aprel kúni Ájiniyaz atındaǵı Nókis mámleketlik pedagogikalıq institutı kásiplik awqamı komiteti tárepinen 2020-2024-jıllarda ámelge asırılǵan jumıslardıń esabı hám komitet baslıǵı jáne quramın saylawǵa arnalǵan konferenciya bolıp ótti.

Konferenciyaǵa Ózbekstan bilimlendiriw hám ilim xızmetkerleri kásiplik awqamı Qaraqalpaqstan Respublikası boyınsha juwaplı shólkemlestiriwshisi Rustam Abduraxmanov, Ózbekstan Kásiplik awqamları Federaciyası Qaraqalpaqstan Respublikası Keńesi shólkemlestiriw bóliminiń baslıǵı Gúlnara Ilmuradova, institut rektorı Quvondiq Qodirov, sonday-aq, prorektorlar, institut fakultetleri, kafedralar hám bólimlerden delegatlar qatnastı.

Ilaj qatnasıwshıları dáslep professor-oqıtıwshılar hám student-jaslardıń qolǵa kirgizgen tabısları, ilimiy-dóretiwshilik jumısları, súwretlew hám qol óneri úlgileriniń kórgizbesi menen tanısıp, institutta shólkemlestirilgen Ájiniyaz muzeyin tamashaladı.

Konferenciya kún tártibine muwapıq, dáslep institut kásiplik awqamı komiteti tárepinen atap ótilgen jıllar dawamında ámelge asırılǵan jumıslar haqqında kásiplik awqamı komiteti baslıǵı Karamatdin Gúlimbetovtıń esabı tıńlandı.

Atap ótilgenindey, házirgi waqıtta instituttıń kásiplik awqamı komitetiniń aǵzaları 17 mıńnan aslam bolıp, xızmetkerler hám student-jaslardıń sociallıq-ekonomikalıq, huqıqıy máplerin qorǵaw, olarǵa tiyisli sharayatlar jaratıw boyınsha nátiyjeli jumıslar alıp barıldı.

Ótken 5 jıllıq dáwir ishinde Sociallıq qamsızlandırıw esap betinen 67 xızmetkerge sanatoriyalarǵa jollamalar ushın 236 million 437 mıń sum qarjı ajıratılǵan bolsa, institut kásiplik awqamı byudjeti esap betinen 140 xızmetkerge densawlıǵın tiklewi ushın jámi 491 million 934 mıń sumlıq jollama berildi.

2020-2024-jıllar aralıǵında institutta jumıs isleytuǵın xızmetkerlerdiń balaları ushın jazǵı dem alıw oraylarına jámi 48 jollama berilip, 59 125 200 sum muǵdarında qarjı jumsaldı.

Kásiplik awqamı komiteti tárepinen olardıń shańaraqlıq jaǵdayların esapqa alǵan halda 556 adamǵa 376 342 796 sum muǵdarında materiallıq járdemler berildi.

Ótken dáwir ishinde ishki turizmdi rawajlandırıw maqsetinde instituttıń professor-oqıtıwshıları hám texnik xızmetkerleri ushın Tashkent, Samarqand, Buxara, Xiywa, Baysın qalalarına, sonday-aq, jergilikli Moynaq, Taxtakópir, Ellikqala, Beruniy rayonlarına sayaxatlar shólkemlestirildi hám 583 xızmetkerge 438 350 000 sum muǵdarında qarjı ajıratıldı.

Jetiskenlikke erisken jaslar hám professor-oqıtıwshılardı qollap-quwatlaw hám bayram sáneleri múnásibeti menen xoshametlew maqsetinde 362 xızmetkerge 253 804 000 sum muǵdarında qarjı ajıratıldı.

Institutta ótkeriletuǵın hár qıylı intellektual, innovaciyalıq, ruwxıy-aǵartıwshılıq baǵdarındaǵı tańlawlar ushın 1 816 728 980 sum, sport hám salamatlastırıw boyınsha jarıslar hám ilajlar ushın 642 738 000 sum muǵdarında qarjı ajıratıldı.

Institut rektoratı menen dúzilgen jámáátlik shártnama tiykarında xızmetkerlerdiń miynet sharayatların jaqsılaw, aylıq miynet haqısın óz waqtında beriw, miynetti qorǵaw hám texnikalıq qáwipsizlik máselelerin jolǵa qoyıw, studentlerdiń oqıw sharayatların jaqsılaw hám stipendiyaların beriw jumısları óz waqtında hám tolıq formada qadaǵalawǵa alınıp, tiyisli tártipte jumıslar alıp barıldı.

Institut kásiplik awqam komiteti ótken dáwir aralıǵında taraw xızmetkerleri hám studentlerdiń sociallıq-ekonomikalıq máplerin, huqıqların qorǵaw boyınsha da birqatar jumıslardı ámelge asırdı.

Bulardıń nátiyjesinde ótken jılı 28-aprel – Dúnya júzilik miynetti qorǵaw kúni múnásibeti menen ótkerilgen «Miynetti qorǵaw hám qáwipsizlik boyınsha jámáátlik qadaǵalawdı shólkemlestiriw» respublikalıq tańlawınıń Qaraqalpaqstan Respublikası basqıshında institut Ózbekstan bilimlendiriw hám ilim xızmetkerleri kásiplik awqamı tarawında «Eń jaqsı kárxana» nominaciyası boyınsha jeńimpaz dep tabıldı.

Konferenciyada sózge shıqqan juwapkerler hám delegatlar institut kásiplik awqamı komiteti tárepinen 2020-2024-jıllar aralıǵında ámelge asırılǵan jumıslarǵa joqarı baha berdi.

Ilaj sheńberinde instituttıń kásiplik awqamı komiteti baslıǵın saylaw hám onıń quramın tastıyıqlaw boyınsha másele de kórip shıǵıldı.

Konferenciyada delegatlar tárepinen jasırın dawıs beriw jolı menen Gúlimbetov Karamatdin Nızamatdinovich institut kásiplik awqamı komitetiniń baslıǵı lawazımına saylandı.

Ilajda institut rektorı Quvondiq Qodirov sózge shıǵıp, kásiplik awqamı komiteti tárepinen ámelge asırılıp atırǵan jumıslardı ayrıqsha atap ótti hám aldaǵı jumıslarına tabıslar tiledi.

Konferenciya juwmaǵında kásiplik awqamı komitetiniń belsendi aǵzalarına estelik sawǵaları tapsırıldı.

NMPI baspasóz xızmeti.