Búgin, 2-aprel kúni Ájiniyaz atındaǵı Nókis mámleketlik pedagogikalıq institutı sport klubı tárepinen student-jaslar arasında sporttı keń en jaydırıw, salamat turmıs tárizin úgit-násiyatlaw, sheber sportshı jaslardı anıqlaw hám olardıń bos waqıtların mazmunlı ótkeriw maqsetinde futbol boyınsha «Rektor kubogi» sport jarısına start berildi.

Ilajda institut rektorı Quvondiq Qodirov sózge shıǵıp, xalqımız, ásirese, jaslarımız arasında sporttıń ǵalabalıǵına erisiw mámleketlik siyasat dárejesine kóterilip, fizikalıq jaqtan jetik, salamat áwladtı tárbiyalaw baǵdarında nátiyjeli jumıslar ámelge asırılıp atırǵanlıǵın atap ótti.

Usı maqsette institutımızda jaqında ǵana paydalanıwǵa tapsırılǵan sport kompleksi hám úlken sport maydanı jaslarımız ushın úlken imkaniyatların esigin ashıwı sózsiz.

Ilajda rektor jaslardı turaqlı túrde sport penen shuǵıllanıp, joqarı nátiyjelerge erisiwge shaqırdı hám olardı bárqulla qollap-quwatlaytuǵınlıǵın málim etti.

Solay etip, instituttıń barlıq fakultetleriniń komandaları qatnasıwında futbol boyınsha «Rektor kubogi» sport jarısına start berildi.

Jarıs juwmaqları haqqında qosımsha maǵlıwmat beriledi.

Institutta jaslar arasında sport jarısları dawam etpekte.

NMPI baspasóz xızmeti.