Búgin, 3-aprel kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Konstituciyasınıń qabıl etilgenine 32 jıl tolıwına arnalǵan saltanatlı ilaj bolıp ótti.

Ilajǵa Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev, Qaraqalpaqstan Respublikası sudınıń baslıǵı Kamal Tariyxov, Qaraqalpaqstan Respublikası Ishki isler ministri Baxtiyar Tórebekov, prorektorlar, fakultet dekanlarınıń orınbasarları, professor-oqıtıwshılar, tyutorlar, student-jaslar hám ǵalaba xabar quralları wákilleri qatnastı.

Saltanatlı ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.

Ilajdı institut rektorı Quvondiq Qodirov basqarıp bardı.

Atap ótilgenindey, konstituciya – hár bir mámlekettiń tariyxı, búgingi kúni hám keleshegin, xalıqtıń erk-ıqrarın ózinde sáwlelendiriwshi tiykarǵı nızam bolıp esaplanadı.

Qaraqalpaqstan Respublikasınıń Konstituciyası 1993-jıl 9-aprel kúni on ekinshi shaqırıq Qaraqalpaqstan Respublikası Joqarǵı Sovetiniń on ekinshi sessiyasında qabıl etilgen.

Qaraqalpaqstan Respublikasınıń Konstituciyası alǵı sóz, 6 bólim, 26 bap, 121 statyadan ibarat.

Konstituciya ámelge asırılıp atırǵan demokratiyalıq reformalardıń hám olardıń nızamshılıq tiykarların jaratıwdıń baslı huqıqıy tiykarı, insan huqıq hám erkinlikleriniń isenimli qorǵalıwınıń kepili bolıp esaplanadı.

Bas Nızamımızda barlıq normalar eń aldı menen insannıń huqıq hám máplerin kepillikke ala otırıp, insan-jámiyet-mámleket principi tiykarında islep shıǵılǵan.

Konferenciyada Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev Bas Nızamımızda belgilengen normalardıń turmısımızda tutqan ornı, sońǵı jıllarda elimizde bilimlendiriw tarawı, sonıń ishinde, jaslardıń joqarı maǵlıwmatlı bolıwı ushın jaratılıp atırǵan sharayatlar hám imkaniyatlar haqqında maǵlıwmatlar berdi. Sonıń menen birge, Qaraqalpaqstan Respublikası sudınıń baslıǵı Kamal Tariyxov Qaraqalpaqstan Respublikası Konstituciyasınıń qabıl etiliw tariyxı, oǵan kirgizilgen ózgeris hám qosımshalar tuwralı aytıp ótti. Qaraqalpaqstan Respublikası Ishki isler ministri Baxtiyar Tórebekov elimizde Konstituciyamız tiykarında nızam ústemligin támiyinlew, bunda «Insan qádiri hámme nárseden joqarı» principine ámel etiw, puqaralardıń huqıq hám máplerin qorǵaw baǵdarındaǵı jumıslardıń áhmiyetine toqtaldı.

Ilajda instituttıń milliy ideya, ruwxıylıq tiykarları hám huqıq tálimi kafedrasınıń baslıǵı E.Tilewov, usı kafedranıń professorı T.Xudaybergenova Konstituciyada insan huqıq hám erkinlikleriniń kepillikleri, olar tiykarında islep shıǵılıp atırǵan normativlik-huqıqıy hújjetler, jaslarǵa baylanıslı mámleketlik siyasattıń baslıǵı baǵdarlarınıń Bas nızamımızda bekkemlep qoyılǵanlıǵı haqqında bayanatlar jasadı.

Shıǵıp sóylewshiler jıynalǵanlardı Qaraqalpaqstan Respublikası Konstituciyasınıń qabıl etilgenine 32 jıl tolıwı bayramı menen qutlıqlap, mámleketimizde nızam ústinligin támiyinlew, jaslardıń huqıqıy sawatlılıǵı hám mádeniyatın arttırıw baǵdarında ámelge asırılıp atırǵan jumıslar haqqında aytıp ótti.

NMPI baspasóz xızmeti.