Usı jıldıń 4-aprel kúni Ájiniyaz atındaǵı Nókis mámleketlik pedagogikalıq institutında qazaq xalqınıń ullı shayırı, ádebiy til hám jazba ádebiyatınıń tiykarın salıwshısı, aǵartıwshı, filosof, kompozitor, awdarmashı hám jámiyetlik ǵayratkeri Abay Qunanbay ulınıń 180 jıllıq yubileyine arnalǵan «Abay ruwxıy ǵáziynesiniń túrkiy dúnyasına tásiri» atamasındaǵı xalıqaralıq ilimiy-teoriyalıq konferenciyası bolıp ótti.

Konferenciyaǵa Qazaqstan, Ázerbayjan, Túrkiya mámleketlerinen, sonday-aq, respublikamızdaǵı aldınǵı joqarı oqıw orınları, ilimiy-izertlew oraylarınan ilimpazlar, doktorantlar hám izleniwshiler qatnastı.

Ilaj qatnasıwshıları institut rektorı Quvondiq Qodirov, Túrkiy tiller fakultetiniń jámááti jáne qazaq tili hám ádebiyatı kafedrasınıń professor-oqıtıwshıları tárepinen saltanatlı túrde kútip alındı.

Miymanlar dáslep institutta qaraqalpaq ádebiyatınıń kórnekli wákili Ájiniyaz Qosıbay ulınıń 200 jıllıǵı múnásibeti menen shólkemlestirilgen Ájiniyaz muzeyinde bolıp, bul jerdegi eksponatlar menen tanıstı.

Konferenciyanıń ashılıw plenarlıq májilisinde institut rektorı Ózbekstan hám Qazaqstannıń barlıq tarawlar boyınsha doslıq hám strategiyalıq sheriklik qatnasıqları, sonıń menen birge, tariyxı, tili, dini, mádeniyatı, turmıs tárizi bir-birine tamırlasıp ketken túrkiy xalıqlar menen dawam etip atırǵan birge islesiw jumıslarınıń áhmiyetine toqtalıp ótti.

Xalıqaralıq ilaj sheńberinde ilimpazlar qaraqalpaq, ózbek, qazaq, túrkmen hám basqa xalıqlar ádebiyatınıń tıǵız baylanısları, Abay Qunanbay ulı dóretiwshiliginiń tek ǵana qazaq xalqı emes, sonıń menen birge, túrkiy xalıqlar hám dúnya ádebiyatındaǵı tutqan ornı, onıń tereń filosofiyalıq, gumanistlik oy-pikirleri, kózqarasları, shıǵarmalarınıń dúnya xalıqları ádebiyatında úyreniliwi, olardı xalıqaralıq kólemde úgit-násiyatlaw hám keleshek áwladlarǵa jetkeriw sıyaqlı máseleler boyınsha bayanatlar jasadı. Óz ara pikir almastı.

Qazaqstannan kelgen miymanlar Abaydıń ádebiy hám filosofiyalıq miyrası pútkil túrkiy dúnya ushın úlken áhmiyetke iye ekenligin atap ótip, onıń 180 jıllıq yubileyi birinshilerden bolıp Qaraqalpaqstan aymaǵında belgilenip atırǵanı ushın institut jámáátine minnetdarshılıq bildirdi.

Ilaj sheńberinde konferenciyanı shólkemlestiriw, sonıń menen birge, joqarı oqıw orınları arasında birge islesiwdi rawajlandırıwǵa úles qosıp atırǵan belsendilerge alǵısnamalar tapsırıldı.

Konferenciya óz jumısın sekciyalarda dawam ettirdi.

NMPI baspasóz xızmeti.