Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidentiniń «Joqarı bilimlendiriw shólkemleri pitkeriwshileriniń jumısqa ornalasıwına kómeklesiw boyınsha qosımsha ilajlar haqqında»ǵı qararı tiykarında ámelge asırılıp atırǵan «Keleshekke qádem» baǵdarlaması sheńberinde ushırasıw bolıp ótti.

Ushırasıwǵa «ÓzMilliybank» akcionerlik jámiyeti Qaraqalpaqstan Respublikası Bas basqarmasınıń «Keleshekke qádem» orayına biriktirilgen qánigeleri Nawrızbek Ibrayımov hám Gúlnaz Jollıbekova, sonday-aq, instituttıń tiyisli juwapkerleri, isbilermenlik penen shuǵıllanıwdı qáleytuǵın 30 ǵa shamalas pitkeriwshi student-jaslar qatnastı.

Ilajda qánigeler bul baǵdarlamanıń mazmunı hám áhmiyeti jóninde qatnasıwshılarǵa tolıq maǵlıwmatlar berdi.

Óz biznes ideyaların ámelge asırıw niyeti bolǵan instituttıń pitkeriwshi kurs studentleri biznes ideyanı tayar joybarǵa shekem jetkeriw procesinde tolıq birge islesiw hám qolaylı shártlerde qarjılandırıw, tarawlar boyınsha ashıq tańlawlar ótkeriw hám jeńimpazlardı jumıs penen támiyinlewge kómeklesiw sıyaqlı máseleler boyınsha ózlerin qızıqtırǵan sorawlarǵa juwaplar aldı.

NMPI baspasóz xızmeti.